Әдебиеттің түрлі жанрында қалам тартқан суреткерлердің жеке заттары, өмірі мен шығармашылығына қатысты бірегей мұрағат материалдары, фото-құжаттары, хаттары, еңбектері экспозиция төрінен орын алған. Солардың қатарында 1975 жылы Ж.Молдағалиевтің музей қорына өзі табыстаған домбырасы, 1972 жылы С.Мұқановтың жары Мәриям Мұқанова музейге сыйға тартқан С.Сейфуллин туралы қолжазбаларының алғашқы нұсқасы, М.Қаратаевтың ең құнды құжаттары мен марапаттарын ерекше атауға болады.
Қамшы – қазақтың дәстүрлі мәдениеті мен тұрмысында маңызды орын алған құрал десек, осы дәстүрді берік ұстанған М.Мағауин тіршілігінде қамшы жинауды әдетке айналдырған. 2014 жылы музейге жазушы өз қолымен 13 қамшысын табыстаған.
«Ұлттық орталық музейдің бай қорында ұлтымыздың мәдениеті мен әдебиетін қалыптастыруда өшпес із қалдырған көрнекті тұлғалар мен қаламгерлердің жәдігерлері ерекше орын алады. Әдебиет майталмандары қалдырған мол мұра, ой тереңдігі, ұлт тағдырын жүрегімен сезінген шығармалары әр буынға шамшырақ болып қала береді. Бүгінгі мерейтойлық көрме – сол асыл есімдерді ұлықтау, әдеби мұраны дәріптеу, ұрпақ санасына аманат ету жолындағы маңызды қадам», дейді Ұлттық орталық музей директорының орынбасары Арайлы Бақытқызы.
Көрменің ашылу салтанатында Жазушылар одағы басқарма төрағасының орынбасары Бейбіт Сарыбай, жазушы-драматург Сұлтанәлі Балғабаев көрме құндылығы турасында сөз сөйлеп, іс-шараға арнайы шақырылған М.Қаратаевтың туысы Шоқан Оразаев пен келіні Жәмилә Құланбайқызы тарихи тұлғалардың өміріне қатысты тың естеліктермен бөлісті.
Көрменің тағы бір маңызды тұсы ретінде, тағылымды шараға С.Мұқанов пен Ғ.Мүсіреповтің әдеби-мемориалдық музей кешені де үн қосқанын атаған жөн. Мәселен, Сәбит Мұқановтың музей-үйінен көрмеге жазушының жеке тұтынған заттары арнайы әкелініпті. Жазушының «Адмираль» кинокамерасы, күмістен жасалған жазу құралы жиынтығы, алтын қолсағаты, магнитофон-диктофоны, костюм-шалбары, Жазушылар одағына мүшелік билеті, әскери билеті және депутаттық билеттері, сондай-ақ жазушының фотосуреттері көрмедегі маңызды жәдігерлердің қатарында.
АЛМАТЫ
