СУРЕТТЕР СӨЙЛЕЙДІ

Жақында ғана жарық көрген фотоальбом “Нұрсұлтан Назарбаев. Фотосуреттер” деп аталады. Мұнда халқының қадірлі азаматы, тәуелсіз мемлекетіміздің іргетасын қалап, бүгінгі кемел шағына жеткізген Елбасы – Тұңғыш Президентіміздің жұмылып жұдырық, бірігіп білек болған, береке-бірлікке ұйып, туыстықты ту етіп көтеріп, ағайындықты бауырластыққа ұластырған ұлт пен ұлыс өкілдерімен әр кездегі жүздесулері бейнеленіпті. Фотосуреттерге көз жіберіп отырғанда, бүкіл Қазақ елінің даласы мен қаласы, жылдың төрт мезгіліндегі Табиғат-Ананың сан түрлі көріністері, Президент қатысқан рухани әлемдегі тарихи оқиғалар, елімізге келген шетелдік мәртебелі меймандармен емін-еркін дидарласулар, жылы шырайлы жүздесулер, ағынан жарылған үлкен-кішінің Нұрсұлтан Әбішұлымен бір дастарқан басында басқосуы, бүкіл елдігіміздің 20 жылға таяу уақыт ішіндегі бел-белесі бір кітаптың өн бойынан орын алыпты. Ұлт Көшбасшысының табиғи болмысы, күш-жігері, қарым-қабілеті әр суреттен айқын аңғарылады. Фотоальбомның бір ерекшелігі әр беттегі суреттердің ортақ ойын біл­діретін бір сөйлем жазу арқылы көп мағына бере алған. Мысалы, Елбасының Ұлы Отан соғысының қаһармандарымен кездесуінде “Ерлік рухы өшпейді” десе, ардақты қауыммен, ақсақалды аталармен жүз­десу сәтіне “Сәлем – сөздің анасы” делініпті. Бір сөзбен айтқанда, фото­суреттерден алар тағылым да, үйренер үлгі де, дерек те жетіп артылады. Сүлеймен МӘМЕТ.