Бірнеше жыл бұрын париждік бойжеткен интернеттен Қазақстан туралы жазба оқып, өз өмірінде бетбұрыс жасайды. Сол сәттен бастап оның қазақ еліне деген ерекше қызығушылығы оянады. Оның есімі – Элиз Пакето.
Бірде ол елімізді көзбен көріп, тамашалауға Каспий жағалауындағы Ақтау қаласына келеді. Бұл қалада халықтың басым бөлігі қазақ тілінде сөйлейтінін байқаған ол ана тілімізді үйренуге ниеттенеді. «Маған қазақ тілінің әуезі қатты ұнады. Адамдармен шынайы байланыс орнату үшін олардың ана тілін білу маңызды деп ойлаймын», деген ойға келгенін айтады.
Оның айтуынша, басты қиындық – қазақ тілін үйрететін сапалы ресурстың аздығы. «Көп материал орыс тілінде, кейбірі түрік тілінде. Ал ағылшын тіліндегі материалдар өте аз, француз тілінде мүлде жоқ десе де болады», дейді ол. Соған қарамастан, қазақ тілін үйренуді тоқтатпапты.
«Ең үлкен әрі керемет тосынсый қазақ халқының ынтасы мен қолдауы болды. Кейінгі кезде, әсіресе бейнежазбаларымның астындағы пікірлерде олардың қолдауы мені одан әрі құлшынуға, бар күшімді салуға жігерлендірді. Қазақ тілі мен мәдениетіне деген қызығушылығым арқылы тамаша адамдармен таныстым. Бұл тілді үйрену мені қазақ мәдениетіне біртабан жақындатты. Тіпті қазақ тілін үйренгісі келетін өзге адамдардан да хабарламалар алып жүрмін. Олар менен кеңес немесе үйренуге арналған материалдар сұрайды, ал мен оларға көмектесуге тырысамын», дейді ол әсерленіп.
Француз қызы Элиз Пакето Париждегі қазақ мәдени орталығына жиі барып тұрады екен. Сенбі күндері болатын қазақ тілі сабақтарына қатысып, тіл игеру мен сөйлеу дағдысын дамытады. Осы орталықта ол көптеген дос тауып, қазақ мәдениетімен тереңірек танысады.
Қазақ тілін үйренгісі келетіндерге ол былайша кеңес береді: «Қорықпаңыздар! Басында қиын көрінуі мүмкін, бірақ қазақтар сіздің әрбір талпынысыңызды жоғары бағалайды және көмектесуге дайын. Қазақ тілі — әдемі әрі үйренуге тұрарлық тіл. Грамматикасы күрделі болып көрінгенімен, уақыт өте оның логикалық тұрғыдан жүйелі екенін түсінесіз. Тілді үйрену – марафон, ал марафонды аяқтаған сайын сіз жаңа мәдениеттің есігін ашасыз».
Парижде тұратын Элиздің алдағы жоспары да тамаша. Ол қазақ тілін жақсы меңгерген соң, қазақтілділерге француз тілін үйретуді, екі тілде кітаптар шығаруды, қазақ тілін үйренгісі келетіндерге арнап француз және ағылшын тілдеріндегі оқу құралдарын құрастыруды, сондай-ақ Франция мен Қазақстан арасындағы мәдени жобаларға қатысуды көздейтінін айтады. «Мен екі ел арасындағы мәдени көпір болғым келеді. Ал қазақ тілі – осы көпірдің ең берік іргетасы», дейді Элиз сеніммен.
