2018 жылы Қазақ ұлттық қыздар педагогикалық университетінің бастамасымен құрылған жас педагог-ғалымдар қауымдастығының төрағасы ретінде Мөлдір Рашидқызы еліміздегі жас зерттеушілерді ортақ мүдде төңірегіне топтастырды. Сондай-ақ ол былтыр Президент жанындағы Ұлттық ғылым академиясы жанынан құрылған Жас ғалымдар кеңесінің президиум мүшесі болып сайланды.
Бүгінде жас ғалымның 50-ге жуық ғылыми мақалалары отандық және халықаралық беделді басылымдарда жарық көрді. Оның ішінде «SCOPUS», «Thomson Reuters» базаларындағы мақалалар және Ғылым және жоғары білім министрлігі ұсынған журналдарда жарияланған еңбектері де бар. Осыған дейін төрт бірдей инновациялық патенттің иегері, 4 әдістемелік құрал мен 3 монографияның авторы атанды. Талантты зерттеушінің жұмыстары халықаралық ғылыми қауымдастықта мойындалып, «SCOPUS» базасы бойынша h-индексі – 4-ке көтерілді.
М.Рашидқызы еліміздегі бірқатар маңызды ғылыми жобаларды іске асыруға үлес қосты. Оның қатысуымен көпфункционалды магниттік материалдар синтезделіп, мультиферроиктер кластарына қатысты жаңа зерттеулер жүргізілді. Уран өндіру саласындағы технологиялық шешімдерге арналған бірнеше жоба оның жетекшілігімен жүзеге асты.
Жас зерттеушінің халықаралық деңгейдегі тәжірибесі де бай. Түркиядағы Йылдыз техникалық университетінің базасында «ULAP» халықаралық ғылыми жобасына қатысып, 3d-металл кешенді оксидтік магниттік нанобөлшектерді синтездеу бағытында зерттеу жүргізді. Бұған дейін Ұлыбританиядағы Кембридж университетінде, Ресейдегі Сібір федералды университетінде, Өзбекстан мен Ресейдің алдыңғы қатарлы зертханаларында тағылымдамадан өтті.
«Болашақ» бағдарламасы аясында Түркиядағы Йылдыз техникалық университетінің Наноматериал және нанотехнология зертханасында ғылыми зерттеулер жүргізді. Оның ғылымдағы бағыты – жаңа инновациялық наноматериалдарды синтездеу және физика – химиялық талдама жүргізу, олардың магниттік қасиеттерін зерттеуге арналған. Сонымен қатар күрделі оксидті қосылыстар мен көміртекті нанотүтікшелер негізінде сутекті синттарымен айналысады.
Әр адамда алуан түрлі арман болатыны рас. Ал ғалымдардың арманы тіптен басқаша. Біз кейіпкерімізден өз арманы туралы сұрағанымызда, мынадай жауап алдық: «2016 жылы Ұлыбритания, Кембридж қаласы, Кембридж университеті, Кавендиш зертханасында (Quantum Matter Group) профессор Сидхарт Шанхер (Монту) Саксенаның жетекшілігімен ғылыми тағылымдамадан өттім. Осында Кавендиш зертханасының базасындағы ғылыми құрылғыларды көріп, қатты әсерлендім. Сонда Қазақ ұлттық қыздар педагогикалық университетінде де осындай ғылыми база болса, онда ғалымдарымыз жұмыс істеп, өздерінің ғылыми-зерттеулерін әлемге әйгілесе деп армандадым. Университет басшылығының қолдауымен осы арманымды іске асыру мақсатында өзімнің ғылыми жұмысымды екі жылға тоқтатып, бар күшімді ғылыми орталық ашуға арнадым. Былтыр біздің оқу орнында бірнеше бағытты қамтитын Пәнаралық зерттеулер орталығы ашылды», деді ол.
Ғалым айтып отырған Пәнаралық зерттеулер орталығы – әртүрлі салалар мен ғылыми бағыттарды біріктіретін терең зерттеу жүргізуге бағытталған. Қазір орталықта «химия-биология-физика» бағытындағы іргелі және қолданбалы ғылыми зерттеулер жүргізуге негізделген, болашақта басқа да бағыттар қамтылады. Осы орталықта алдағы таңда Спектрлік талдау зертханасы, Рентгендік фазалық талдау зертханасы, Жаңа материалдарды синтездеу зертханасы, Жаңа материалдарды синтездеу зертханасы, Кванттық магнитометриялық зерттеулер зертханасы сияқты 9 ғылыми зертхана жұмыс істемек.
Бір сөзбен айтқанда, Мөлдір Рашидқызы – ғылымға жан-тәнімен берілген зерттеуші ғана емес, жас ғалымдарға жол нұсқап жүрген тәжірибелі ұстаз. Оның табандылығы, халықаралық тәжірибесі ғылымға адалдығы еліміздегі жас буынға үлгі болады.
