Осы шешімнің бастамашысы – Respublica партиясынан сайланған Мәжіліс депутаты Олжас Құспеков. Депутат алғаш рет криптоактивтерді елдің алтын-валюта резервтерінің құрамына енгізу мүмкіндігін қарастыруды ұсынды. Ол мұндай қадам ұлттық резервтерді әртараптандыруға, экономиканы жаһандық тәуекелдерден қорғауға, сондай-ақ қаржы жүйесінің икемділігі мен жаңа мүмкіндіктерін арттыруға жол ашатынын атап өтті.
Бастамаға Жасанды интеллект және цифрлық даму министрлігі мен ҚР Ұлттық банкі қолдау білдірді. Жаңа қор құрамына әлемде мойындалған негізгі цифрлық активтер — Bitcoin, Ethereum және стратегиялық резервтер ретінде қарастырылатын басқа да жетекші құралдар енгізіледі.
Олжас Құспеков, Мәжіліс депутаты, Respublica партиясы:
«Қазақстан цифрлық болашақты қуып жетуші емес, бағыт беруші болуы тиіс. Крипторезерв – жай ғана инновация емес, экономиканы заманауи және тұрақты ететін стратегиялық қалқан. Бұл шешім елдің тұрақтылығы мен дамуына қызмет ететін жаңа қаржылық экожүйені қалыптастыруға жол ашады».
Маңыздысы – крипторезерв ұлттық валюта – теңгенің орнына қолданылмайды және төлем құралы болып табылмайды. Ол дәстүрлі активтерді толықтырушы элемент ретінде әрекет етіп, мемлекеттің қаржылық тұрақтылығының кепіліне айналады.
Қазақстанның крипторезервін құру – бұл инновациялық әрі орнықты экономикаға бет бұру, еліміздің ғаламдық аренадағы орнын нығайту және цифрлық болашаққа дайын екендігін көрсету жолындағы маңызды қадам.
