Сурет «Егемен Қазақстанның» архивінен алынды
Сондықтан «Келешек мектептері» ұлттық жобасы білім беретін орын ғана емес, ол әр балаға өзін-өзі табуға мүмкіндік беретін жаңа кеңістік. Мемлекет басшысы Қасым-Жомарт Тоқаев: «Әділетті Қазақстанды құру үшін біз ең алдымен сапалы білім беру жүйесін қалыптастыруымыз керек» деп айтқан еді. Бұл «Келешек мектептері» бағытын айқындайтын бағдаршам іспетті.
Аталған ұлттық жобаның мақсаты – еліміздің барлық аймағында кез келген балаға қолжетімді жаңа форматтағы білім беру ұйымдарын құру. Дәлірек айтқанда, ұлттық жоба балалардың тұрғылықты жеріне қарамастан, заман талабына сай жағдайда сапалы білім алу мүмкіндігін қамтамасыз етуге бағытталған. Жобаның басты артықшылығы – онда оқушыларға қолайлы, эргономикалық білім беру кеңістігі жасалып отыр. Бұл мектептердің көлемі типтік жобаларға қарағанда 15-20%-ға үлкен, ал техникалық жарақтануы 4 есеге артық. Осының бәрі ұстаздардың жұмысын жеңілдетіп, оқушылардың білім сапасын көтереді.
Президент бастамасымен қолға алынған «Келешек мектептері» ұлттық жобасы аясында Жезқазған қаласындағы Қабанбай батыр елді мекенінде екіқабатты 300 орындық білім ордасы бой көтерді. Қазіргі таңда білім беру нысаны оқушыларға қолайлы заманауи үлгідегі құрал-жабдықтармен жабдықталды. Жеткіншектердің жан-жақты шығармашылық дамуына толық жағдай жасалған. Жаңа заманауи білім ошағында қауіпсіздік жүйелері күшейтілген. Мәселен, бейнебақылау арқылы мектепке кіріп-шыққандар қадағалау жүйелерімен қамтылған. Сондай-ақ әр сынып кабинетінің іші кең, терезесі үлкен. Ерекше балаларға арналған жеделсаты жұмыс істейді. Оқушыларға спортпен айналысуға барлық жағдай бар. Қысқасы, бұл жоба әр баланың толыққанды дамуына мүмкіндік береді.
Бейнелеп айтқанда, білім – ұлттың іргетасы болса, ал «Келешек мектептері» сол іргетасты нығайтатын басты тірек. Дәлірегінде, Келешек мектептері – болашаққа бастайтын алтын көпір. Бұл – ұлттың интеллектуалды әлеуетін көтеріп, елдің даму қарқынын жеделдететін басты күш. Әр балаға сапалы білім беріп, тең мүмкіндік жасаған елдің болашағы қашанда жарқын болмақ.
Медет СЕЙТБЕК,
Жезқазған қаласындағы №12 жалпы білім беретін мектеп директоры
Ұлытау облысы
