Бүгінде модульдік үй құрастыру әлемнің көптеген елінде белсенді жүзеге асқан. Мысалы, Қытайдың Шэньчжэнь қаласындағы «Tencent» кеңсе орталығы, «CitizenM Tower of London» қонақүйі, Канаданың Монреаль қаласындағы «Habitat» 67 тұрғын үй кешені – модульдік ғимараттардың жарқын көрінісі.
Осындай негізге құрылған университеттің инженерлік тобы жобалаған нысандар темірбетон модульмен салыстырғанда 10 есе жеңіл, жұмыс күшін 5 есе аз қажет етеді. Сейсмикалық қауіпсіз жоба кәнігі құрылыстан 2 есе қалтаға қонымды. Жоба жетекшісі, Қазақстанның құрметті құрылысшысы Ерік Тұрашұлының айтуынша, модульдік үйді кез келген орынға оңай орналастыруға болады.
«Техникалық сипаттамасы талапқа сай модульдік үйлердің пішініне де таңдау көп. Мәселен, сұранысқа сай қоғамдық ғимараттарды, сауда нысандарын, туристер тұрақтайтын орындарды шеңбер, доға, үшбұрыш формада да құрастыру ойластырылған. Біз бұл үйді шәкірттеріммен бірге университет ауласында құрастырдық. Қазір жаңа жүйемен салынған нысан студенттердің демалатын, шығармашылықпен айналысатын алаңына айналған», деп сөз сабақтаған Сәтбаев университетінің профессоры жоба, әсіресе туризм саласын түлетуге серпін беретінін атап өтті. «Еліміздің табиғаты – көп қырлы. Тау, шатқал, жер бедерінен бірнеше шақырым төмен ораналасқан көрікті мекендер көп. Сондай орындарға туристерді тарту үшін жайлы орын болуы маңызды. Біздің жоба осы мәселені аз шығынмен шеше алады. Арнайы цехта дайындалған темір қаңқаларды техникамен жеткізу де жеңіл әрі оңай құрастырылады. Сонымен бірге маусымдық саяхат кезінде бос қалса су тасқыны, өзге де төтенше жағдайда қабылдау пункттерінің қызметін атқара алады. Себебі жобада инфрақұрылымдық, өмір сүруге қажетті бөліктер ескерілген», деді Ерік Тұрашұлы.
Екі жетекші мен 11 студент құрастырған модульдік үй жобасын Қазақ бас сәулет-құрылыс академиясының мамандары да жоғары бағалаған. Ізденушілер бастамасы Қырғызстандағы ғылыми байқауда да жүлде еншіледі. Жобаның өзге де ұтымды тұсын университеттің 3-курс студенті Мадияр Шраздин айтып берді.
«Жоба идеясы былтыр туды. Ұстаздарымыз Ерік Тұрашұлы мен Қазақстанның құрметті архитекторы Серік Сыздықұлы ойымызды бірден қуаттады. Жұмыс барысында тәжірибелерімен бөлісіп, кемшілігімізді күзеп-түзеді. Соның нәтижесінде экологиялық таза, мобильді жобамызды іске асырдық. Модульді үй бір қабатпен шектелмейді. Жобалау барысында материалды өзара алмастыру, қажеттілік туғанда дайын үйдің қапталынан, жоғарыдан блок қосу мүмкіндігі қарастырылған», деді болашақ инженер.
Енді топ мүшелері жобаның ауқымын кеңейтіп, шетелге шығаруды көздеп отыр. Ғаламдық сұраныс тамырын басып отырған студенттер модульдік үй жобасы халқы тығыз орналасқан Африка елдеріндегі де баспанаға қажеттілікті бюджет тұрғысынан тиімді шешуге болатынын тілге тиек етті.
