ҚЫЗЫЛАҒАШТА ТАҒЫ ДА 122 ҮЙ БЕРІЛДІ

СУ ТАСҚЫНЫНАН ЗАРДАП ШЕККЕН ЕЛДІ МЕКЕНДЕР ЖАҢАРЫП, ҚОНЫС ТОЙЛАРЫН ӨТКІЗУДЕ Қызылағаштықтардың қуанышы баршаның мерейі. Өйткені, Елбасы биылғы наурыз айында тасқыннан кейін тұрғындардың жан жарасын жазуға жедел, әрі нақты тапсырма берсе, ел-жұрт бар ықылас-ниетімен қамқорлық жасағанын кім ұмытсын. “Көп түкірсе – көл”, деген. Мемлекеттен де, халықтан да қаржылай, заттай, азық-түлік, тағы басқа заттар үздіксіз келіп жатты. “Алматы–Өскемен” күре жолы­мен ары-бері ағылғандар бел асқан­нан қызыл, жасыл шатырлы әсем үйлер мен жасыл желек жамылған ме­кенді көріп, қызығады. Сол ұмы­тылмас 12 наурыздан бері 110 күн өтіпті. Бой көтерген ауыл жаңа ғасырда жасарған, жаңарған десек, асыра айтылмағаны. Десе де “Ба­тыр­мын деп мақтанба, Жеңіп қайт­пай, Жақсымын деп мақтанба, Ха­лық айтпай” демекші, қиындықты жеңген батырлық, сол кезде ын­ты­мақ пен бірлікті ұстанғаны жақ­сы­лық екенін жұртшылық жиі қай­та­лайды. Жұдырық жұмылып, білек біріккенде қиындыққа жол жоқтығы дәлелденді. Бұған дейін аталған елді мекенде 365 тұрғын үй қайта салынып, бар жиған-тергенінен бір сәтте айрылғандарға теледидар, үй жиһазы, газ, төсек-орын беріліп, басқа да тұрмыстық жеңілдіктер жасалған-ды. Қызылағаш ауылында сәрсенбі­нің сәтінде, яғни 30 маусымда тағы да қоныс тойы өтті дүркіреп. Жаңа сән-салтанаты жарасқан Мәдениет үйіндегі мерейге бұл жолы да облыс әкімі Серік Үмбетов қатысты. Тасқын болғаннан бері тұрғындармен жиі кездескен  басшыны осындағы ең­кей­ген кәріден жас балаға дейін жазбай танитын болыпты.  Аман­дық-саулық, күнделікті тіршілік мәселесі сөз болды. Көктемдегі келеңсіздікті қозғамай, тек бүгінгі мерейдің шуағына шомылғандар ертеңгі күндеріне сенімді екендік­терін білдіруде. Ауылдың батысындағы шатырлы қалашық орны босап, үйлі бол­ған­дар жаңа қонысқа көшіпті. Күннің аптап ыстығына қарамастан  Мәде­ниет үйіне жиналған халық та, балалар да мәз. Халық алдында сөз алған облыс әкімі Серік Үмбетов әңгімесін әріден бастады. – Көктемдегі тасқыннан кейінгі жылаған ана, жылаған бала, әкенің жабырқаған жүздері әлі де көз ал­дым­нан кетпейді. Бұл ұмытылатын оқиға емес. Менің сол кездегі көңіл-күйімді өзім ғана білемін. Бір түннің бір шығатын күні болады. Сол кезде түскен еңсемізді Мемлекет басшысы Нұрсұлтан Назарбаевтың нақты тапсырмасы, демеуі, қолдауы тіктеді. Қазақстандықтардың пейілі мен қамқорлығын сезіндік. Елбасынан бастап, баршаға  сіздердің аттары­ңыздан алғыс айтамын.  Бүгін елі­міздің жүрегі Астананың туған күні қарсаңында бас қосып отырмыз. Бұл мерекенің еліміз үшін орны бөлек. Барлық өңірдегі қала, ауыл Астанаға қарап бой түзейді, ондағы ел өмірін өркендетуге байланысты сындарлы саясатпен қаруланып, оны жүзеге асыруға бар күш-жігерін жұмы­л­дырады. Бұл үрдіс осы ауылда да өріс алуда. Бүгін міне, тағы да 102 жаңа үй мен қайта жөндеуден өткен 20 үйдің кілтін иелеріне тапсыра­мыз. Сондай-ақ Мәдениет үйі, аудан­дық ІІБ тірек қосыны, “Қаз­пошта” мен ауылдық округ әкім­дігінің ғимараттары, Алланың үйі – мешіт күрделі жөндеуден өткізілді. Бұл нысандар бүгіннен бастап халық игілігіне қызмет етеді, деп әр отбасына бақыт, қуаныш, береке-бірлік тіледі. Қызылағашта қалпына келтіру жұмыстары қолға алынған 19 наурыздан бергі мерзімде 400-ден астам жаңа үй салынды. Барлық  тұрғындарға 25 түрлі  жиынтықтан тұратын үй жиһазынан бастап, тұр­мысқа қажеттіліктермен қамтылға­нын айтуға болады. Бұдан кейін әкімнің қолынан жаңа үйдің кілтін алған Несіпжамал Алшынбаева толқи сөйледі. – Көріп тұрсыздар, Қызылағаш қызыққа толды. Жайнап, жасарды. Көше де, үй де әсем. Тасқыннан кейін су басқан үйіміздің орнына әйтеуір баспана салып берсе деген ойда болдық. Осындай сәулетті үйге кіреміз деген  жоқ едік. Отбасым­ның қуанышын айтып жеткізе алмаймын. Халқын сүйген, оның тағдырына алаңдаған Мемлекет басшысына, құрылысшыларға алғыс айтамын, – деді. Жиналғандар алдында Сайлау Алдабергенов сөйлеп, бата берді. Ал ҚазМҰУ-дың студенті, осы ауылдың тұрғыны Ілескен Әлбатыр жырдан шашу шашса, тағы басқалар сөйлеп, тасқыннан бері кезеңдегі ауыл тұрғындарына жағдай жасалға­нын жеткізіп, ауылдастары атынан Мемлекет басшысы Нұрсұлтан Назарбаевқа, жалпы көмек көрсет­кен қазақстандықтарға ізгі ниеттерін білдірді. Тасқын су айналып өткен 200 адам мінәжат ететін мешіт те күрделі жөндеуден өтіпті. Облыс әкімі бастаған халық құрбан шалып, әруақтарға Құран бағыштады. Мәдениет үйіндегі жиын соңы “Қазақконцерт” өнер ұжымының қызылағаштықтарға арналған қайырымдылық концертіне ұласты. Күмісжан БАЙЖАН. Алматы облысы.