Шығармашылық кешті Қырғыз Республикасы Ұлттық жазушылар одағының мүшесі Жамалкүл Сабаева жүргізіп отырды. Алдымен Ресей мемлекеттік кітапханасының әлеуметтік-мәдени бағдарламаларының үйлестірушісі, өнертанушы Маргарита Мкртычева сөз алды.
«Ресей мемлекеттік кітапханасы – еліміздегі басты әрі Еуропадағы таңдаулы ірі кітапханалардың бірі. Осынау оқырманы көп үлкен кітапханада қазақ ақыны Марфуға Бектемірованы еске алуға арналған шығармашылық кештің өтуі – елеулі оқиға. Бұл өмірден ерте кеткен ақын есімін құрметтеп, оның шығармаларын туған жерінен тысқары жерлерге де кеңінен насихаттау болып саналады. Осы игі істің жүзеге асуына барынша жанашырлық танытып, ұйытқы болдық», деді ол.
Ал Ресейдегі Қазақстан елшілігінің кеңесшісі Еркебұлан Бектұрғанов ақынның шығармашылығына тоқталды.
«Марфуға Бектемірованың сыршыл өлеңдерін жас кезімізден оқыдық. Тек өкініштісі, ақынның арамызда жоқтығы. Ақынды еске алу кеші Мәскеу қаласының төрінде өткеніне қуаныштымыз. Бұл – еліміз үшін мерей, мақтаныш. Сондай-ақ екі ел арасындағы достық қарым-қатынасты нығайтып, мәдени байланыстарды жандандырады», деді ол.
Мәскеу кәсіби әдебиетшілер одағының, Ресей Жазушылар одағы Мәскеу облыстық ұйымының мүшесі Айнұр Бекболотова «Марфуға Бектемірова шығармаларының арқауы», «Кайрыктар казынасы – Московские напевы» әдеби бірлестігінің мүшесі Замира Зайлидинова «Марфуға Бектемірованың аудармашылық қызметі» деген тақырыптарда баяндама жасады. «Орыс-вьетнам достығы» қоғамының төрағасы Фам Дык Хаи Марфуға Бектемірова өлеңдерін тыңдай отырып, жылы әсер алғанын айтты.
Ресей Жазушылар одағы Мәскеу облыстық ұйымы басқармасының мүшесі, жазушы Ирина Овчаренко, «Я деловая женщина» журналының бас редакторы Гүлжан Давлетбекова, «Аруу дүйнө» әдеби бірлестігінің жетекшісі Айжан Мамасадықова ақын өлеңдерін орыс, қазақ, қырғыз тілдерінде оқыды.
Азия мен Африка елдері Ассамблеясы әдеби кеңесінің төрағасы, «ЛИффт» қорының президенті, әдебиет сыншысы Маргарита Аль бүгінгі таңда арамызда жоқ болса да Марфуғаның шығармашылығы өзіне жақын көрінетінін тілге тиек етіп, оның нәзік сезімге толы жырларын өзге тілге аударуға шақырды.
Ресей жұртшылығына Марфуға Бектемірованың есімі жақсы таныс. «Единая Россия» партиясы мен Ресей Федерациясы Мемлекеттік Думасының қолдауымен ақынның «Белый парус мечты» кітабы жалпы таралымы 10 мың данамен шықты. Бір топ өлеңдері «Молодая гвардия» журналында жарық көрді.
«Марфуға Бектемірованың Мәскеуде шыққан «Белый парус мечты» деген кітабы ұнады. Қазақшасы «Арманның ақ желкені» болады ғой. Аз ғана ғұмыр кешкен талантты ақынның арманы орындалса екен, Ресей жұртының алдында беделіміз көтерілсін деп іс-шараны ұйымдастырудың жауапты бір бөлігін өз мойныма алдым. Бұл, бір жағынан, Қазақ елінің абыройы ғой. Өзім Орынбор жерінде тусам да, атажұртқа қарайлап, бауырларыма тілектес болып жүремін», деді «Санкт-Петербургтегі Орынбор қазақтарының жерлестігі» қоғамдық бірлестігінің президенті Айгүл Иришева.
Әдеби кешті «Кайрыктар казынасы – Московские напевы» қоғамдық бірлестігі, «Санкт-Петербургтегі қазақтардың Орынбор қазақтарының жерлестігі», «Горячее озеро» әлеуметтік-мәдени жобаларды дамыту және дәстүрлі отбасылық құндылықтарды сақтау жөніндегі бірлестігі, «Бирге» медиаресурсы Еуразия мен Африка халықтары Ассамблеясының және Қазақстандағы Халық дипломатиялық Халықаралық Достастығының қолдауымен ұйымдастырды. Сондай-ақ кешті өткізуге еліміздің Сыртқы істер министрлігі, Қазақстанның Ресейдегі елшілігі қолдау көрсетті.
