«Қазақ ауылының» ашылу рәсімі Аманкелді кентінің іргесіндегі «Тәж-Торғай» туристік кешенінде өтті. Салтанатты іс-шараға жергілікті тұрғындар, мұғалімдер, оқушылар, алыс-жақыннан келген меймандар қатысты.
Көпшілік 50 қобызшы мен 50 домбырашы қосылып орындаған күй шеруін тамсана тыңдап, өнерпаздарға қошемет көрсетті.
Жоба авторларының айтуынша, мұнда балалар мен жасөспірімдер асық атып, атқа мініп, тай үйретуге жаттығады. Ұсталыққа, қолөнерге үйренеді. Қыз балалар жүн түтіп, жіп иіріп, құрақ құрап, күбі пісіп, май шайқап, құрт сығып неше түрлі ұлттық тағамдарды әзірлеуге машықтанады.
Жергілікті тұрғындардың үлкен мерекесіне айналған іс-шара барысында ақ шаңқан киіз үйлер бой түзеп, этнографиялық жәдігерлердің көрмесі ашылды. Үлкен-кіші қосылып асық атып ойнады.
Ауыл іргесіндегі мерекеге талай жылдан бері осы «Тәж-Торғай» туристік кешенін бастан-аяқ салып бітіремін деп шапқылап жүрген белгілі меценат Сапар Ысқақов ағамыз да арнайы келіпті.
«Қазақтың бай рухани мұрасын ұрпақ жадында сақтап қалудың бір жолы – осындай жобалар. Ауылдың болмысын, салттың сәнін көзімен көрген бала – ел мен жердің қадірін білетін азамат болып өседі», дейді Сапар Ысқақұлы.
Қостанай облысы
