Іс-шара барысында көзі нашар көретін оқырмандар қазақ әдебиетінің мұзарт шыңдарына айналған Шерхан Мұртазаның «Ай мен Айша», Сайын Мұратбековтің «Жусан иісі», Әбіш Кекілбаевтың «Махаббат мұнарасы» және басқа да қаламгерлердің шығармаларынан ықшамдалып алынған сахналық қойылым қойды.
Асқар Тоқпанов атындағы облыстық қазақ драма театрының сахнасына шыққан кітапхана оқырмандарының бойынан өнерге деген адалдық байқалып тұрды. Олар өздеріне берілген рөлдерді барынша жақсы игеруге тырысты. Кәсіби режиссерлермен жұмыс істеудің мәнін ұққан оқырмандарға көрермен қауым разы болды.
«Болашақ» мектеп интернатының түлектері, «Асыл арман» шығармашылық орталығының өкілдері, мектеп олимпиадаларын және мектептен тыс іс-шаралар өткізетін облыстық орталықтың «Драма» студиясы және өзге ұжымдар қолдау көрсеткен байқауда қатысушылар «Үздік актерлік шеберлік», «Үздік қойылым», «Үздік екінші пландағы рөл», «Көрермен көзайымы» аталымдары бойынша марапатталды.
«Еліміз бойынша көзі әлсіз көретін азаматтар арасында тұңғыш рет өткізілген байқауда көркем әдебиетті насихаттауға ден қойдық. Оқырмандарымыз қазақ әдебиеті алыптарының көркем туындыларын сахнаға алып шықты. Әрине, бұл бағыттағы жұмыс алдағы уақытта жалғасады. Ең бастысы, кітапхана оқырмандарының театр өнеріне деген құрметі бөлек», дейді ұйымдастырушылардың бірі Гүлзада Қырықбаева.
Тараз
