Фото: ҚР Қорғаныс министрлігі
Іс-шара барысында халық қалаулыларына кіші командалық құрам мамандарын даярлау жүйесі мен кадеттерді іріктеу тәртібі туралы ақпарат берілді. Бұл жөнінде ҚР Қорғаныс министрінің тәрбие және идеология жөніндегі орынбасары, генерал-майор Шайх-Хасан Жазықбаев баяндады.
Депутаттар колледждің материалдық-техникалық жабдықталуына, казарма мен асхананың жай-күйіне, медициналық көмек көрсету деңгейіне ерекше мән берді. Сондай-ақ спорт залы мен медициналық бөлмеге бас сұғып, жауынгерлік дайындыққа жасалған жағдайды бағалады.
Депутат Айдос Сырымның айтуынша, колледжге негізінен оңтүстік өңірлерден келген жастар түседі. Ол еліміздің барлық аймағындағы мектептерде әскери білім беру мекемелерінің артықшылықтарын түсіндіретін кәсіптік бағдар жұмысын күшейту керектігін айтты.
«Жастар әскери біліммен қатар, болашақта азаматтық салада да кәдеге жарайтын мамандық алып шығуы керек. Бұл – олардың мотивациясын арттырады», – деді ол.
Сапар аясында колледждің кітапханасы, музейі және спорт кешендері де назардан тыс қалған жоқ. Депутаттар кадеттердің рухани және патриоттық тәрбиесіне байланысты жүргізіліп жатқан жұмыстармен танысты.
Соңында халық қалаулылары оқу орнының жеке құрамымен кездесу өткізіп, әскери білім беру жүйесіндегі заңнама талаптарын түсіндіріп, жастардың сұрақтарына жауап берді.
Арайлым Мырзахан,
ЕҰУ студенті
