Өткен жылы мол астық алғанымен, өнімін лайықты бағаға сата алмаған шаруалар биыл бағасы тұрақты әрі бидайға қарағанда, нарықта жоғары сұранысқа ие майлы, бұршақты дақылдарды көбейтуді көздеп отыр. Осыған орай, майлы дақылдың көлемі 755 мың гектарға дейін ұлғаяды. Бұдан тыс әлеуметтік маңызы бар дақылдарға да баса мен беріледі. Биыл өңірде 21 мың гектар қарақұмық, 6,1 мың гектар картоп тұқымын егу жоспарланған.
«Қазір ауыл шаруашылығы құрылымдарында 514,2 мың тонна тұқым қоры бар. Бұл көктемгі дән сіңіру науқанына толық жетеді. Өткен күзде 1 млн 342 мың гектар жер қайта өңделіп, тыңайтылды. Қыстай 495 мың гектар алқапта қар тоқтату жұмыстары жүргізілді. Биыл көктемгі егіс жұмыстарына 42 мыңнан астам техника шығады. Техниканың бәрі жөндеуден өткен. Шаруашылықтардың біразы мемлекеттік бағдарламалар арқылы техника паркін жаңартып алды», дейді облыстық ауыл шаруашылығы басқармасының басшысы Ибрагим Бекмұхаметов.
Егін шаруашылығында өнім көлемін арттырудың тиімді жолдарының бірі – суармалы жерлерді ұлғайту. Былтыр өңірде суармалы алқаптың көлемі 8 430 мың гектардың үстінде болса, биыл тағы 3 463 гектар суармалы алқап қосылады. Ауыл шаруашылығы құрылымдарының алдында тұрған маңызды міндеттің бірі – егіс алқаптарын әртараптандыру, монодақылдан алшақтау. Биыл шаруашылықтар осы мәселеге баса көңіл бөлмек.
Қостанайлық шаруалар минералды тыңайтқыштарды пайдалану жөнінен де алдыңғы қатарда келеді. Мәселен, былтыр алқапқа 258,6 мың тонна тыңайтқыш шашылған. Шаруалардың дені маңызды науқанды ойдағыдай атқару үшін мемлекет қолдауына арқа сүйейді. Мәселен, «Даму» қоры филиалының мәліметінше, бүгінге дейін «Кең дала» бағдарламасы аясында 30,9 млрд теңгеге өтінім қабылданып, оның 14,5 млрд теңгесі қаржыландырылған. Бұдан тыс «Тобыл» әлеуметтік-кәсіпкерлік корпорациясы арқылы 20,1 млрд теңге көлемінде жеңілдетілген несие беріліп жатыр.
Алқап жұмыстарына кірісіп кеткен науырызымдық шаруалардың айтуынша, биыл топырақ ылғалының қалыңдығы орташа, шамамен 50-70 см болады. Өңірдің солтүстік аудандарында ылғал мол.
«Күн ысып кетпей тұрып топырақ құрамында бар ылғалды сақтап қалу керек. Тұқым жеткілікті, техника дайын. Мемлекет тарапынан жылдағыдай қолдау көрсетіліп жатыр. Арзан дизельді отын бөлінді, жеңілдетілген шартпен несие алып жатырмыз», дейді диқандар.
Қостанай облысы
