Қазір де қазақ-қырғыз қаламгерлері өзара сыйластықтың, сырластықтың бейнесін көрсетіп жүр. Бұл күндері есімі аталған қос халыққа етене таныс Сұлтан Раевтың «Жанжаза» романы «Фолиант» баспасынан қайталай жарық көріп, Астанада өткен VIII Eurosian Book Fair кітап жәрмеңкесінде таныстырылымы өтіп, оқырманға жол тартты. Жынды жетеудің шөл даладағы сапарын суреттеп, сол арқылы адамзатқа үлкен ой айтқысы келген қаламгердің бұл романы талай жылғы тынымсыз еңбектің жемісі екені шындық. Шығарманы оқи келе біз әртүрлі қиындықтарға кездессе де, мойымаған жеті кейіпкердің үміті мен аңсары, мұраты мен мақсаты бөлек екенін түсінеміз. Иә, жеті ықылым заманды көз алдыңызға әкелетін жеті кейіпкері бар роман енді қазақ оқырманына қолжетімді.
