Кәсіптік мамандықтар кеңістігі

Фестивальдың ашылуында сөз сөй­леген Премьер-ми­нистр­дің орынбасары Тамара Дүй­сенова жұмысшы мамандықтары ел эко­номикасының тірегі екенін атап өтті.

«Бүгін жұмысшы мамандық­тары­ның қаншалықты өзгергеніне куә болып отырмыз. Бұрындары бұл ма­мандықтар ауыр әрі қарапайым ең­бек­пен байланысты деп есептелсе, қазір жағдай мүлде басқа. Осы күні жұ­­мыс­шылар заманауи технологияларды бас­қаратын, үлкен өндірістік үде­рістің маңызды бөлігіне айналып отыр. Фестиваль жастардың сұранысқа ие мамандықты танып-білуіне, сол саланы таңдауына мүмкіндік береді», деді Үкімет басшысының орынбасары.

Аталған жиында Оқу-ағарту ми­нистрі Ғани Бейсембаев техникалық және кәсіптік білім жүйесін үлкен өзге­ріс күтіп тұрғанын айтты.

«Биыл 1 қыркүйектен бастап кол­ледж­­дерді қаржыландыру көлемі екі есеге ұлғаяды. Қазіргі уақытта кол­ледждерге 518 кәсіпорын шефтік қам­қорлық көрсетеді, ал болашақта олар­дың санын 4 мыңға дейін арттыра­­мыз. Сонымен қатар Жұмысшы ма­ман­дықтары жылында іске асырылатын не­гізгі іс-шаралардың бірі – еліміздің 10 колледжін интернационалдандыру болмақ. Мұндағы негізгі мақсат — олардың жаһандық деңгейде бәсеке­ге қабілеттілігін арттыру және білім бағ­дарламаларын халықара­лық стан­дарттарға сәйкестендіру. Осы мақ­сат­та атом энергетикасы саласының ма­мандарын даярлауда Мажарстанның тәжі­рибесін енгізу, сондай-ақ Қытайдың IT, дрон құрастыру, машина жасау саласындағы тәжірибесін қолдану жос­парланып отыр», деді Ғани Бейсембаев.

Министрдің айтуынша, биыл Аста­на­да техникалық және кәсіптік бі­лім ұйымдарының студенттерін қолдау әрі дамыту мақсатында Ұлт­тық құзыреттілік орталығы құрыл­мақ. Мұндай орталық Қытайда, Оңтүс­тік Кореяда және БАӘ-де табысты нәтиже көрсетіп келеді. Ал осы күзде Ақтауда «TurkicSkills», яғни түркітілдес елдер арасында I кәсіби шеберлік чемпионаты өтпек.

Айта кетейік, «Жұмысшы маман­дықтары қаласында» сегіз тақырып­тық көше ашылды. Атап айтсақ, мұнда тау-кен ісі және металлургия, машина жасау және көлік, энергетиктер мен мұнайшылар, ауыл шаруашылығы мен су шаруашылығы мамандары, құры­­лысшылар, құтқарушылар, өрт сөн­­дірушілер, медицина, туризм, сон­дай-ақ болашақ мамандықтарына ар­налған көшелер бар. Сонымен қатар «Жұмысшылар қаласында» 40 креа­тивті үй тұрғызылған. Яғни фести­валь­ға қатысушылар түрлі кәсіптің ерек­шелігімен танысып, заманауи жабдықтармен өздері жұмыс істеп көре алады. Бес күн бойы қала аумағында түрлі семинар мен шеберлік дәрісі, хакатон, кәсіптер шеруі, бос орындар жәрмеңкесі, стартаптардың тұсау­ке­серлері, концерттер мен тренингтер өтеді. Фестиваль барысында қонақ­тар өндіріс үдерісіне тікелей араласып, өздерін нағыз өндіріс желісінде отырғандай сезіне алады. Сонымен бірге машиналар мен құрылғыларды қолмен құрастырып, жұмысшы маман­дықтарының қыр-сырын түсінеді. Оқу­шылар мен студенттер заманауи тех­нологиялардың маңызын ұғынып, еңбек нарығында сұранысқа ие жаңа кәсіптермен танысады.

Оқу-ағарту вице-министрі Еділ Оспан­ның айтуынша, фестивальдың негізгі мақсаты – жұмысшы маман­дықтарының қазіргі заман талабына сай өзгергенін көрсету, әсіресе балалар мен жастарға таныстыру. Өйткені көпші­лік ара­сында жұмысшы мамандық­тары ауыр қара жұмыс деген түсінік қалыптасқан. Алайда қазіргі таңда бұл салалар жоғары технологиялармен жаб­дықталып, авто­маттандырылған, цифр­лық мүмкін­дік­терге негізделген. Мінеки, осы «жұ­мысшы қаласына» келген қонақтар әртүрлі маман­дықтың жаңа технология­лары­мен байланы­сын, олардың еңбек нары­ғындағы маңы­зын жете ұғынады.

«Фестивальға 30 мыңнан астам адам, оның ішінде көптеген мектеп оқушы­лары мен студенттер қатысады деп күтіліп отыр. Бірінші күннің өзінде 5 мыңнан астам қонақ келіп, түрлі өндіріс саласымен танысып, өздерін қызықтырған сұрақтарға жауап алды. Жаңа оқу жылынан бас­тап колледж студенттеріне бөлінетін мем­лекеттік қаржыландыру екі есе өседі. Нақты­рақ айтсақ, әр студенттің жан басына шаққан­дағы қаржысы 412 мың тең­геден 937 мың теңгеге дейін ұлғая­ды. Қазір елімізде бірнеше колледж мен кәсіпорындар арасында жаңа фор­маттағы серіктестік орнатылған. Мысалы, «СарыарқаАвтоПром» және Қостанай мемлекеттік колледжі бірле­сіп, жыл сайын 250 маман даярлайды. Яғни студенттер колледжде оқып жү­ріп-ақ кәсіпорында тәжірибеден өтеді. Оқу бітіргеннен кейін бірден жұ­мысқа орналасады. Бұл жүйе білім мен тәжірибені біріктіріп, білікті маман­дар даярлауға мүмкіндік береді», дейді вице-министр.

Иә, осы күні заманауи технология­лардың дамуына байланысты жұмысшы мамандықтары да өзгеріске ұшырап жатыр. Мысалы, кен орындарын дрондар арқылы бақылайтын күнге жеттік. Бұрын шахтерлер шахтаға түсіп, қауіпті жағдайда жұмыс істесе, енді бұл үдерісті виртуалды көзілдірік пен жаңа технологиялардың көмегімен жер үстінен басқаруға болады. Одан бөлек, ауыл шаруашылығындағы дрон операторларының да пайдасы ұшан-теңіз. Өйткені бұл құрылғы егістік алқаптарын бақылау, тыңайтқыш себу, суару жүйелерін қадағалау сияқты жұмыстарды тыңғылықты атқарады. Мінеки, «Жұмысшы мамандықтары қаласында» осы секілді заманауи технологиялар көпшілікке таныстырылды.

Айта кетейік, аталған фестиваль — Жұмысшы мамандықтары жылының беташары іспетті. Бұл – болашақ ма­ман­­дардың, жұмыс берушілердің, тех­ни­калық және кәсіптік білім ұйым­­дарының өзара ынтымақтастығы үшін құрылған алаң. Фестивальдың біре­гей форматы қонақтарға әртүрлі кәсіп­тің ерекшеліктерімен танысуға және ин­терактивті алаңдар мен маман­дан­дырылған жабдықтардың көмегімен эко­номиканың түрлі саласында өздерін сы­нап көруге мүмкіндік береді.