Бүгінгі сөз танымал скрипкашы Ерасыл Хамит туралы. Оның өнеріне Рим Папасы Франциск ерекше риза болыпты. Қазақ баласының Папамен кездесу сапары бір жыл бұрын жоспарланыпты. Ватикан өкілі оның Венадағы жеке концертіне арнайы барып, тума таланттың өнеріне тәнті болып қайтқаннан кейін көптеген кездесу ұйымдастырылыпты.
«Венада жеке концертім өтті, оған Ватикан елшісі қатысты. Оның мақұлдауынан кейін біз қыркүйек айында Римге соңғы кездесуге бардық, сол жерде кардинал мен оның көмекшісіне шағын жеке концерт бердік. Тек осыдан кейін концерттің өтетіні толық шешілді. Кездесу керемет өтті. Рим Папасымен тілдесу сәті де түсті. Ол өте қарапайым және мейірімді кісі екен. Дәстүр бойынша, жүздесу барысында оның жүзігін сүйіп, тізе бүгу керек еді. Бірақ ол мұндай рәсімнің қажеті жоғын айтып, қол алысудың жеткілікті екенін білдірді. Концерт барысында Папа Франциск ойнаған музыканы мұқият тыңдап, бірнеше рет басын изеді. Мұны оның риза болғанының белгісі деп қабылдадым. Мен оған аргентиналық композитор А.Пьяццоланың «Либертангосы» орындадым. Рим Папасы қатты әсерленіп, бұл туынды оған туған жерін еске салғанын айтты. Кездесу соңында маған Папаның қолынан айқыш белгісі мен батасын алу құрметі бұйырды. Бұл мен үшін сәулелі сәттің бірі болмақ», дейді Ерасыл Хамит ағынан ақтарылып.
Кейіпкеріміз М.Венгеров, Н.Цнайдер, М.Мартин, Т.Самуил сияқты әлемге әйгілі музыканттардан жеке сабақ пен шеберлік дәрісін алған музыка маманы. Ерасылдың тынымсыз құлшынысы оған өз саласында керемет нәтиже сыйлады. Айталық, ол Кронберг (Германия), Сан-Жан-де-Люздегі «Равель» фестивалі (Франция), «Лак Леман» фестивалі (Швейцария), Больцано фестивалі (Италия), Графенегг фестивалі (Аустрия) секілді халықаралық музыкалық фестивальдерге қатысып, өз өнерін көрсетті. Сонымен қатар Густав Малер атындағы академияның қатысушысы болып, Графенегг академиясына екі рет қатысқан.
Ерасыл Хамит Алматы қаласында дүниеге келген. Римский-Корсаков атындағы консерватория жанындағы арнайы орта музыкалық мектепте білім алған. Санкт-Петербургте оқыған кезінде ол Мравинский байқауы, «Виват Талант» және басқа да халықаралық байқаулардың лауреаты атанды. Сондай-ақ ол Санкт-Петербургтің камералық және симфониялық оркестрлерімен бірге бірнеше рет өнер көрсетті. 2013 жылы білімін жалғастыру үшін Мәскеудегі П.Чайковский атындағы консерваторияның орталық музыка мектебіне профессор, кафедра меңгерушісі Сергей Кравченконың сыныбына қабылданды.
Осыдан кейінгі Ерасыл Хамиттің өнер сапары Зальцбург қаласындағы Моцартеум университетінде жалғасты. Онда өнерпаз өрен профессор П.Амояльдың сыныбына оқуға түсіп, білімін шыңдады. Қазіргі уақытта Ерасыл Венадағы Музыка және орындаушылық өнер университетінде профессор А.Данаилованың сыныбында оқып жатыр. Музыка мемлекеттердің мәдени байланысын дамытуға септігін тигізетін саланың бірі. Дүниежүзілік деңгейдегі оқу ордаларынан білім алып, еларалық мәдени байланысты нығайтуға үлес қосып жүрген Ерасылға өнерің өрлей берсін дейміз.
