Киелі өлкеде Қазақстанның еңбек сіңірген қайраткері, Мемлекеттік сыйлықтың лауреаты, актер Нұрқанат Жақыпбай, «Құрмет» орденінің иегері, жазушы Жақыпжан Нұрғожаев, Қазақстанның еңбек сіңірген қайраткері, кино және театр актері Омар Қиқым, Қазақстанның еңбек сіңірген қайраткері, күйші, композитор Ермұрат Үсенов, философия ғылымдарының докторы, профессор Света Бердібаева, Қазақ журналистикасының қайраткері Сағатбек Медеубекұлы, басқа да есімі елге танымал ақындар мен қаламы қарымды журналистердің кіндігі кесілгенін ескерсек, бұлардың қатары әлі талай дарындармен толыға түсері анық.
Ауыл тұрғындары көптен күткен нысанның ашылуына Алматы облысының Мәдениет, архивтер және құжаттама басқармасының басшысы Данияр Әлиев, облыстық дене шынықтыру және спорт басқармасының басшысы Ерболат Сарабекұлы, жазушы Ақсәуле Әбдіхалыққызы, әдебиет сыншысы Бағашар Тұрсынбайұлы, қарқаралық өнер майталмандары, қоғамдық ұйым өкілдері қатысты.
«Шалғай ауылдардың ішкі түйінді мәселелерін орнымен шешіп отыру – мемлекетіміздің басты назарында. Облыс әкімі Марат Елеусізұлының қолдауымен ауданның мәдениет саласына тың серпін берілді. Өңірдегі Жалағаш, Бөлексаз, Жылысай ауылдарында заманауи мәдениет үйлері салынды. Қарабұлақ Мәдениет үйі күрделі жөндеуден өтіп жатыр. Сонымен қатар 157 млн теңгеге мәдениет ошақтары жылжымалы сахна, дыбыс күшейткіш құралдармен, сахналық киімдермен толықты. Жарқын жобалардың жүзеге асуы – ең алдымен, еліміздің өркендеп өсуімен қатар, жастарымыздың денсаулығын нығайтуға, мәдениет пен өнердің кеңінен таралуына ықпал етері сөзсіз», деді аудан әкімі Нұрбақыт Теңізбаев.
Жаңадан ашылған мәдени нысан ауыл халқының бос уақытын тиімді пайдалануына, түрлі тақырыпта мәдени іс-шаралар өткізуге арналған. Спортзалмен біріктірілген мәдениет үйі заманауи құрылғылармен толықтай жабдықталған. Тіптен, лифт те іске қосылған. Мұнда мыңға тарта кітап қоры бар кітапхана мен өнер үйірмелері жұмыс істейтін болады.
«Киелі Кеген ауданының көз сүйсінтер табиғаты мен сыр тұнған тарихын таспалап, ауданның фотошежіресін жасаудамыз. Оны алдағы уақытта табыстаймыз. Келешекте осы ғимаратта фотограф болуға ниетті балалар болса, 2-3 күндік дәріс өткізіп, тәжірибеммен бөлісуге дайынмын. Мұндай өнер ошағы бос тұрмай, ауыл балаларының талантын ашып, талабын ұштауға қызмет етуі керек», деді тұрғындарды қуанышымен құттықтаған республикалық «Фотоөнер» қоғамдық бірлестігінің төрағасы, кәсіби фотограф Асылхан Әбдырайымұлы.
Салтанатты іс-шара барысында туған ауылының ажарын ашып, көркін кіргізген мәдениет үйінің салынуына атсалысқан азаматтарға осы ауылдан түлеп ұшқан өнер қайраткерлері Нұрқанат Жақыпбай мен Сағатбек Медеубекұлы жүрекжарды алғысын жеткізді.
Бұдан кейін кең сарайдай мәдениет үйінің алқызыл лентасы қиылып, кимешек киген әжелер шашу шашты. Ауыл халқы алғаш рет жайлы да жұмсақ орындыққа жайғасып, аудандық көркемөнерпаздар ансамбілінің концерттік бағдарламасын тамашалады.
Сондай-ақ бұл күні спортзалмен біріктіріліп салынған ғимаратта аудан волейболшыларының ақтық ойыны өтіп, жарыс жеңімпаздары бағалы сыйлықтармен марапатталды. Осылайша өнерпаздар мен спортшылар қатар өнер көрсетті. Мәдениет үйі алдағы уақытта жарқын істер мен жетістіктердің жылы ұясына айналмақ.
Алматы облысы
