«Шымкент қаласының 112 пультіне Қаратау ауданындағы Құдайбергенов көшесінде орналасқан жеке тұрғын үй аумағында ересектердің қарауынсыз қалған 2024 жылы туған қыз баланың құдыққа құлап кеткені туралы хабарлама түсті. Оқиға орнына ТЖМ құтқарушылары жедел түрде жіберілді. Келген кезде құдықтың тереңдігі шамамен 24 метр екені анықталды», делінген ТЖМ хабарламасында.
Құтқарушылар альпинистік жабдықтарды пайдаланып, құдыққа түсіп кеткен баланы алып шыққан. Қыз бала әрі қарай тексеру үшін жедел медициналық жәрдем бригадасына тапсырылды.
Осы ретте ТЖМ балаларды қараусыз қалдырмау керек екенін тағы бір еске салды.
