Қостанайда жоғалған жасөспірім табылды

АСТАНА. 28 сәуір. Қостанай полицейлері із-түссіз жоғалып кеткен 14 жастағы Михаил Ольмезовты егіс алқабынан тапты. Бұл туралы Қостанай облыстық ішкі істер департаментінің баспасөз қызметі хабарлады. Тәртіп сақшылары Михаил Ольмезовты 5 күн бойы іздеді. Тіпті полицейлер іздестіру жұмыстарын жүргізу үшін арнайы топ құрып, ізшіл иттің көмегіне жүгінген. Осының нәтижесінде жоғалған жасөспірім Арман ауылының маңындағы жазық алқаптан табылды. Михаил Ольмезовтың анасы 22 сәуір күні ұлының жоғалғаны жайында полицейлерге хабар берген. Оның айтуынша, ұлы кешкі уақытта үйінен шығып, Рязанов селосына кеткен ол содан қайта үйіне оралмаған. Сондай-ақ, анасы Михаилдың соңғы уақытта бірнеше мәрте үйінен қашуға әрекет жасағанын айтты. Қостанай қалалық ішкі істер басқармасының басшысы Марат Есергепов: «Жоғалған жасөспірімді іздестіруге полицейлерден бөлек, ауыл тұрғындары да атсалысты. Михаилды сыртынан көргендер ол велосипедпен Майкөл ауылына қарай бағыт алғанын айтты. Алайда, біз оны Арман ауылына жақын маңдағы егіс алқабынан таптық», – деді. Қазіргі таңда жасөспірім аудандық ауруханаға жеткізілген. Дәрігерлер оның жауынның астында қалып, денесі мұздап қалғанын айтуда. Қазір Михаил Ольмезов дәрігерлердің жіті бақылауында. Талғат Райымбек. Дерек, сурет: Қостанай облыстық ішкі істер департаментінің баспасөз қызметі.