Қоғам • 10 Шілде, 2024

Жаңартылған сайлау жүйесі түсіндірілді

73 рет
көрсетілді
3 мин
оқу үшін

ОСК төрағасы Нұрлан Әбдіров жұмыс сапарымен Абай және Шығыс Қазақстан облыстарына барып, Жарма, Бесқарағай және Ұлан ауданы аумақтық сайлау комиссияларының қызметімен танысты. Сондай-ақ аудандық, қалалық және облыстық сайлау комиссияларының төрағалары, олардың орынбасарлары және хатшыларымен семинар-кеңестер өткізіп, ауылдық жас сайлаушылармен кездесті.

Жаңартылған сайлау жүйесі түсіндірілді

фото: semeytany.kz

Семинар-кеңестер жергі­лікті сайлау комиссиялары мүше­лерінің сайлау және референдум туралы заңна­маны тестілеуден басталды. Тестілеу нәтижелері бойынша Н.Әбдіров сайлау науқан­дарын ақпараттық сүйемелдеу және тағайындау, әкімдер мен мәслихаттар депу­тат­тығына кандидаттарды ұсыну және тіркеу, кандидаттар мен саяси партиялардың сенім біл­дірілген адамдарының, байқау­шыларының құқықтары мен мін­дет­тері, сайлау алдындағы үгіт, дауыстарды санау, сайлау мен референдумдар қорытын­ды­л­арын шығару мәселелеріне қатыс­ты оқыту жүргізуді тапсырды.

Кеңес барысында ОСК төр­­аға­сы сайлау жүйесіндегі ауқымды өзгерістерді атап өтіп, 2025 жылдан бастап аудан әкім­дерін сайлауға және биыл күзде шығып қалғандардың орнына мәслихаттардың депутаттарын сайлауға байланысты мәселелерді егжей-тегжей түсіндірді.

Сонымен қатар кеңесте материалдық-техникалық жа­рақтан­дыру, мүгедектігі бар адамдардың сайлау құқықта­рын қамтамасыз ету, сайлау сала­сындағы шетелдік тәжіри­бе мәсе­лелері талқыланып, «Респуб­ликалық референдум туралы» Конституциялық заңға ен­гізілген өзгертулер мен толық­тырулар түсіндірілді. ОСК-ның стратегиялық перспективалары мен басымдықтарына тоқталған Н.Әбдіров: «Бас­ты басымдығымыз – сайлау­шылардың сенімі», деді.

Аудандардың жас сайлаушыларымен кездесулерде ОСК басшысы Қазақстанның жаңар­тылған сайлау жүйесі­нің ерекшеліктері, сайлау сала­сын­дағы өзекті трендтер мен халықаралық тәжіри­бе, басқа елдердегі сай­лаулар мен референдумдарды ОСК халықаралық байқауы туралы айтты. Кез­десулерге қатысушылар сайлау тақырыптарына қатысты бел­сен­ді пікірталас өткізді. Ауыл жастары қызықты пікір ай­тып, түрлі сұрақтар қойды. Мәсе­лен, Жарма ауданының жас маманы Ә.Мейіржанұлы басқа елдердің орталық сайлау органдары арасындағы ынтымақтастықты кеңейту мәселелеріне қызығушылық танытса, Бесқарағай ауданында жас заңгер А.Антонова Мажар елін үлгі ете отырып, 16 жастан бас­тап дауыс беруді енгізудің орын­дылығы туралы сұрақ қойды. А.Миятова дауыс беру кезінде студенттерді ықтимал қысымнан қорғау әдістері туралы сұрады. Жас оқытушы С.Ыс­қақова сайлаушылар үшін дауыс берудің баламалы түрлерін енгізу­дің маңыздылығы туралы айтып, олардың, әсіресе қария­ларға ыңғайлылығын атап өтті.

Кездесуде жастар сайлау саласының өзекті мәселелері жайында дәстүрге айнал­ған онлайн-сауалнамаға бел­сенді қатысты. Ал белсен­ді қатысушыларға «ҚР сайлау туралы» Конституциялық заң­ға түсініктеме, «Орталық сайлау комиссиясына – 30 жыл. Қазақстанның сайлау жүйесінің трансформациясы» атты монография, 2012-2023 жылдар аралығында өткізілген сайлау және референдумдар туралы ақпараттық жинағының екінші томы тапсырылды.