Форумға елдің барлық өңірінен 500-ден аса қонақ жиылды. Олардың қатарында саяси және қоғам қайраткерлері, кәсіпкер, білім және ғылым саласының қызметкерлері, көпбалалы аналар болды. Басқосуда азаматтық сектор мен халықаралық ұйым өкілдері отбасылық-демографиялық саясат жөнінде, әйелдердің қоғамдағы рөлі турасында маңызды мәселелерді талқылады. Бұл қатарда отбасыларды әлеуметтік және экономикалық қолдау, бала құқығы және әйел теңдігіне қатысты да ұсыныс-пікірлер айтылды.
Форумның ашылу салтанатында Президент жанындағы Әйелдер істері және отбасылық-демографиялық саясат жөніндегі ұлттық комиссияның төрағасы, Мәдениет және ақпарат министрі Аида Балаева комиссияның атқарған жұмыстарына аз-кем тоқталып, әйелдерге алғыс айтты.
– Форумға еліміздегі отбасы, гендерлік, демографиялық саясатқа тікелей қатысы бар қыз-келіншектерді шақырдық. Оның ішінде комиссия құрылғалы бері ұлттық және өңірлік комиссияның төрағасы болған азаматтармен жүздескенімізге қуаныштымыз. Комиссия төрағасы ретінде сан саланы дамытуға, елдің өркендеуіне іс жүзінде қолдау көрсетіп жүрген қыз-келіншектерге ризамыз. Сондай-ақ отбасы құндылығы, бала құқығын қорғау, әйел құқығы, теңдігіне тікелей қатысты біршама толымды іс тындырғандарға алғыс айтқым келеді, – деді А.Балаева.
Осыдан соң Астана қаласы әкімінің орынбасары Есет Байкен әйелдерді қолдау бағытында іске асқан жұмыстардың ретін баяндады.
– Бүгінде Астана тұрғындары 1 млн 400 мыңнан асты. Статистика бойынша халықтың жартысынан көбі – әйелдер. Елорданың қыз-келіншектері түрлі салада табанды еңбек етіп, қаланың әлеуметтік-экономикалық, қоғамдық-саяси өміріне белсенді араласады. 90 мыңға шамалас шағын және орта бизнесті қыз-келіншектер басқарады. Мемлекеттік қызмет саласында еңбек ететін әйелдердің де үлесі артып келеді. 30 мыңнан аса көпбалалы отбасылар назарымыздан тыс қалмады. Сонымен қатар қала әкімдігі адами капиталды дамытуға және әйелдерді әлеуметтік қолдауға Әйелдер істері және отбасылық-демографиялық саясат жөніндегі қалалық комиссия арқылы да ерекше көңіл бөледі. Мысалы, комиссия былтыр 50-ге жуық іс-шара өткізді. Қиын жағдайға тап болған жүздеген отбасыға қолдау көрсетті. Әйелдер кәсіпкерлігін дамыту бағытында да іске асып жатқан жұмыстар көп, – деп түйіндеді Е.Байкен.
Бірі білсе, бірі білмес, 25 жылда Ұлттық комиссия отбасылық және гендерлік саясаттағы өзекті мәселелер бойынша шаруаларды тәп-тәуір үйлестірген. Комиссия мен серіктестердің арқасында әйелдер, отбасы және балалар құқығын қорғауға бағытталған жүздеген табысты жоба мен бастама іске асқан. Әрі комиссия салаға қатысты маңызды шешім шығарумен шектелмей, оны орындайтын бірегей органға айналып үлгерген. Бұл туралы «Amanat» партиясының хатшысы, Президент жанындағы Әйелдер істері және отбасылық-демографиялық саясат жөніндегі ұлттық комиссияның мүшесі Шолпан Каринова, БҰҰ-ның Қазақстандағы тұрақты үйлестірушісі Микаэла Фриберг-Стори және басқа да спикерлер айтты. Комиссияның жұмысын мадақтап, белсенді әйелдерге табыс тіледі.
Бұдан кейін форум TEDX форматында жалғасып, елдің әлеуметтік-экономикалық, қоғамдық-саяси өміріне таудай үлес қосып жүрген белсенді, танымал әйелдер сыр бөлісті. Олар әңгімесін жетістікке жету жолындағы қиын да қызықты сәттерден бастап, қазақ әйелдерінің асыл қасиеті жөнінде мазмұнды оймен түйіндеп жатты. Ізінше комиссия мүшелері қонақтарды әйелдер құқықтары мен отбасылық құндылықтарды қорғау саласында ынтымақтастықты нығайтып, бірлесіп жұмыс істеуге шақырды.