Суретті түсірген – Ерлан ОМАР, «EQ»
Әрине, туризмді табыс көзіне айналдыруға кез келген ауылдықтың әлеуеті жете бермейді. Мемлекет қазір кәсіпкерлерге, соның ішінде жас кәсіпкерлерге қолдау көрсетіп жатқанын білеміз. Тек бөлінген қаржы баршаға бірдей бұйырмайды. Мүмкіндікті қолы жеткендер ғана пайдаланады. Орайы келгенде туризмді дамытуға септесетін тағы бір сәтті қадам жайында айталық.
Білсеңіздер, еліміздегі ірі өндіріс компаниялары өзінің негізгі жұмысынан тыс әлеуметтік бағдарламаларға қолдау көрсетіп отырады. Мысалы, 2022 жылы Орталық Азияның Еуразия қоры серіктес «Шеврон» компаниясымен бірге «Байтақ жер» жобасын əзірлеген. Жоба жетекшілері кеңесе келе экотуризм, этнотуризмді дамытуға қолайлы ауылдарды көпшілікке танытуды жоспарлаған. Соның бір бағыты бизнес жобасын іске асыра алмай жүрген ауыл тұрғындарын қолдау арқылы ішкі туризмнің көкжиегін кеңейту болыпты. Былтыр жазда қор мен компанияның өкілдері өлкенің көрсе көз тоймайтын табиғатын одан әрі таныта түсу үшін БАҚ құралдарын Қорғалжын, Зеренді, Сандықтау бағытын қамтитын турға шақырған еді. Сапар барысында біз үш ауданда қаржылай қолдаудың шарапатын көрген кәсіпкерлермен жүздесіп, ісіне табыс тілегенбіз. Көп ұзамай жобаның екінші кезеңі қазанда басталып, 70-тен аса жергілікті кәсіпкер өтінім қалдырған екен. Әрине, бұл тізімде жоба жетекшілері ұйымдастырған арнайы сабақтан өтіп, іріктелгендер, өзіне тиесілі қаржылай қолдаудан құр қалмады.
Жоба маманы Айжан Жансұлтанованың айтуынша, бизнеске қарастырылған қаржының шарапаты мол. Оның үстіне Ақмоланың табиғатын туристер жазда ғана емес, қыста да қызықтай алады.
– Агротуризм де – туризмнің бір бағыты. Әсіресе, Көкшенің көз тартатын табиғаты агротуризмге жайлы. Мұны басқа-басқа кәсіпкерлер жақсы біледі. Олар қонақүй, мейрамханалар салып, туристік инфрақұрылымдар дамыса, аймаққа инвесторлар қызыға бастайды. Жаңа жұмыс орындары ашылады. Түптің түбінде осының барлығы жергілікті тұрғындардың туристерге көзқарасын өзгертеді. Жергілікті халық туристердің неге қызығатынын шындап түсіне бастайды. Аймақтың тұрақты дамуына жол ашылады. Агротуризммен келген туристер орманшылармен бірге аң-құс, өсімдіктерді тамашалап, ағаш дәндерін жиып, көшет отырғыза алады. Осылайша, табиғатты қорғауға титтей де болса үлес қосады. Бұл ауылдың тыныс-тіршілігінен хабардар жандарға қызықсыз көрінуі мүмкін. Дегенмен туристерге қызық, – дейді А.Жансұлтанова.
