Қайта күшейген коронавирус

Қазір Астана қаласында коронавирус инфекциясы бойынша эпидемиялогиялық жағдайды тұрақты деп ай­ту­ға келмейді. Себебі 24 қа­зан­нан бүгінге дейін вирус жұқтырғандардың саны тәулігіне 61-ден 69-ға дейін жетті. Вирустың таралу жиілігі желтоқсан айында 4,6 пайызға артып, сырқаттанғандардың саны 70-тен 322 жағдайға дейін өскен. Соңғы аптада, яғни 29 қарашадан 7 желтоқ­санға дейін коронавирус ин­фекциясының 432 жағдайы тіркелген. Бұл коронавирус жұқтырғандардың саны алдыңғы аптамен салыстыр­ғанда 1,8 есе өске­нін көрсетеді. Ал өткен тәулікте коронавирус инфекциясын жұқтырғаны алғашқы зертханада расталған 67 жағдай тіркеліпті. Соған қарамастан, Астана қаласы эпи­демиологиялық жағдай бойынша жасыл аймақта қала бермек. Сондықтан елор­да­ның санитарлық-эпи­де­мио­ло­гиялық бақылау депар­таменті басшысының орынба­сары Жанна Пралиева коро­навирустың алдын алу үшін тұрғындарды санитарлық талаптарды сақтап, вакцина алуға шақыруда.

«Омикрон» штамы­нан вирустың «Цер­бер» деген түрі шықты. Коронави­рус инфекциясының «Цербер» штамынан вирус жұқтыр­ғандардың саны артуы мүм­кін. Мамандардың айтуын­ша, «Цербер» тез тарайды. Вирустың мутацияға ұшы­ра­ған жаңа түрінің симп­то­­мы жіті респи­раторлық вирус­тық инфекцияға, яғни тұмауға ұқсас. Дене қызуы көтеріліп, буын ауыруы мүм­кін. Сондай-ақ әлсіздік байқа­лады. Соған қарамастан, мамандар Церберден адам өміріне айтарлықтай қауіп жоқ екенін айтады. Кейінгі 48 аптадағы эпидемиологиялық жағдай бойынша қалада жіті респираторлық вирустық инфекцияның 6 648 жағдайы тіркелген. Коронавирус инфекциясы мен тұмаудың өршуіне байланысты тұрғындарға вакцина алып, тұрғылықты мекенжай бойынша емханаларға жүгінуге кеңес беремін. Себебі вирустың алдын алудың ең тиімді әдісі – вакциналау. Коронавирус инфекциясының тоқтап, мутацияланбауына қоғамдық иммунитет қарсы тұра алады», дейді Ж.Пралиева.

Астана қаласы қоғамдық денсаулық сақтау басқармасы басшысының орынбасары Берік Қайкенов те вакцина алған тұрғындар сырқаттанған күннің өзінде вирустың белгілері жеңіл өтетінін айтады.

– Қазір Астана қаласында 6 инфекциялық стационар жабдықталған. Онда 184 төсектік орын бар. Қазір инфекциялық стационарларда 105 адам ем алып жатыр. Олардың ішінде 85 адамның коронавирус инфекциясын жұқтырғаны белгілі болса, 20-сы пневмониямен түскен. Реанимацияда 7 науқас ем алуда. Вакциналау мен ревакциналауды уақтылы алған адам өзін вирустан 90 пайызға дейін қорғайды. Нақ қазір елордада 12 мың вакцина бар (QazVac, Sinopharm, Pfizer). Өздеріңіз білетіндей, осыған дейін пандемия салдары сырқатты емдеуден бұрын алдын алу шаралары тиімдірек екенін көрсетті. Ал вирусты алдын алудың бірден-бір жолы – вакциналау, – дейді ол.

Мамандар вирус жұқтыр­ған­дардың дерегін талдап, сырқаттанғандардың басым көпшілігі вакцина салдыр­мағанын анықтаған. Сондықтан эпидемиолог дәрі­герлер қала тұрғындарын вакцина алып, санитарлық ережені сақтауға шақыруда.