Астанада ұйымдастыру комитетінің отырысы өтті. Іс-шараға саяси кеңес мүшелері мен белсенділер қатысты.
Отырыста атап өтілгендей, сайлауалды штаб үгіт-насихат науқанын бастауға дайын. Кандидаттың сайлауалды бағдарламасы дайындалып, таратылатын материалдардың, сыртқы жарнаманың дизайны әзірленген. Өңірлердегі өзекті мәселелерге қатысты халықтың пікірін жинау бойынша жұмыс жүргізілген.
Сайлауалды штабының басшысы Асхат Рахымжанов үгіт алдындағы жұмыстың қорытындылары туралы хабарлады. Оның айтуынша, ЖСДП кандидатын қолдау мақсатында еліміздің барлық өңірінде 121 мыңнан астам қол жиналған, оның 119 мыңы есепке алынды.
ЖСДП кандидаты өзінің үгіт-насихат науқанын Қарағанды облысынан бастайды. Ол бүгін Шахтинск қаласында жергілікті сайлаушылармен кездесу өткізбек.
Сондай-ақ отырыс барысында штаб өкілдері алдағы жұмыс жайын талқылап, негізгі мақсаттар мен міндеттерді белгіледі.
