ФОРУМ АЯСЫНДАҒЫ КЕЗДЕСУЛЕР

Кеше Сенат Төрағасы, ЕҚЫҰ Парла­мент­тік Ассамблеясының вице-президенті, Трансазиялық парламенттік форумы Ұйымдастыру комитетінің төрағасы Қасым-Жомарт Тоқаев бастаған қазақ­стандық делегация осы форумдағы деле­гация басшыларымен бірқатар кездесулер өткізді, деп хабарлады осы палатаның баспасөз қызметі. Атап айтқанда, Қ.Тоқаев Ауғанстан Ислам Республикасы парламенті Волуси Джирга (төменгі палата) төрағасының бірінші орынбасары Мирвайс Ясини және АИР Мешрано Джирга (жоғарғы палата) төрағасының орынбасары Азизулла Улфатимен кездесті. Ауғандық әріптестерімен кездесу барысында Қазақстан Парламенті Сена­тының Төрағасы Қазақстанның ЕҚЫҰ-ға төрағалық етуі аясында өткізіліп отырған Трансазиялық форумға ауған делегация­сының қатысуы шараның ерекшелігін арттыра түсіп, бұл ұйымның қызмет аясы мен тұрпатын кеңейтеді және әлем қоғамдастығы парламентші­лерінің зор ықыласын туғызады деп атап өтті. – Қазақстан Парламентінің Сенаты  Ауғанстан парламентімен көпжақты ынтымақтастықты кеңейтуге және терең­детуге мүдделі, екі ел парламентшілерінің арасындағы үнқатысудың келешегі зор, – деді Қ.Тоқаев. Ол сондай-ақ, Ауғанстан мәселелері талқыға салынатын ЕҚЫҰ саммитін  өткізуді Қазақстан ұсынып отырғанын еске салды. Ауғанстан Ислам Республикасы Волу­си Джирга төрағасының бірінші орын­басары Мирвайс Ясини қазіргі заманның өзекті мәселелері сөз болатын  форумға ауған парламентшілері шақырылғаны үшін шынайы алғысын білдірді. Ол сондай-ақ Ауғанстанға көрсетіліп жатқан көмекке орай Қазақстан басшылығы мен оның халқына ризашылығын жеткізді. Кездесудегі әңгіме барысында ауған жағы ислам елдерін Ауғанстанды қалпына келтіруге белсенді атсалысуға шақырды. *  *  * Қасым-Жомарт Тоқаев Пәкстан Сена­ты төрағасының орынбасары Мир Джан Мұхаммад Хан Джамалимен кездесті. Қазақстан Сенатының басшысы пәкстандық әріптесін Қазақстан Пар­ламенті жоғарғы палатасының құрылымы мен қызметі туралы хабардар етті. Ол алдағы жылы Қазақстанның Ислам Конференциясы Ұйымына төрағалық етуі аймақтағы көптеген өзекті мәселелерді талқылауға мүмкіндік беретінін айтты. Әңгіме барысында пәкстандық парламентшілер Қазақстанның ЕҚЫҰ-ға белсенді және табысты төрағалық етіп келе жатқанын, Трансазиялық парламент­тік форумның күн тәртібіндегі мәселелер­дің көкейкестілігін және шараның ұйымдастырылуы жоғары деңгейде екенін атап өтті. Қазақстан-Пәкстан парламентаралық байланыстарын одан әрі дамыту және оны нығайту мақсатында Пәкстан Сенаты төрағасының орынбасары қазақстандық әріптестерін Пәкстан парламентіне ресми сапармен келуге шақырды. *  *  * Қасым-Жомарт Тоқаев пен Ресей Федерациясы Федералды Жиналысы Феде­ра­ция Кеңесі төрағасының бірінші орын­басары, ТМД Парламентаралық Ассам­блея­сы делегациясының форумдағы бас­шы­сы Александр Торшинмен кездесуде Ресей­дің Федералды Жиналысы Федерация Ке­ңе­сімен парламентаралық байланыстарды кеңейту туралы сөз болды. Әңгімелесушілер Қазақстанның ЕҚЫҰ-дағы қарқынды қызметі, ха­лық­аралық парламенттік ұйым аясындағы қазақстандық және ресейлік парламент­шілердің өзара табысты іс-қимылы мен бірлескен істерінің одан әрі үйлесімді болуының маңызын атап өтті.