Фотосуретшілер ерекше қорғалатын табиғи аумақта сирек кездесетін аң-құстарды, Қызыл кітапқа енген гүл-шөптерді түсіріп, көрермен назарына ұсынған. Алтайдың қойын-қолатын бір аралап шығып, түз тағыларын түсіріп алу оңай шаруа емес. Көрмеге қойылған жүз шақты фото он-жиырма жылдың еңбегі.
– Катонқарағай ұлттық табиғи паркі 2001 жылы құрылған. Қазақстандағы ең ірі ерекше қорғалатын табиғи аумақ. Мұнда Көккөл сарқырамасы, Рахман қайнары, Берел қорғандары сынды көрікті, танымдық орындар бар. Саябақ аумағында құстардың 300-ден астам түрі, өсімдіктердің мың, жануарлар мен балықтардың жүзге жуық түрі кездеседі. Міне, бүгін солардың суреттерін көрермен назарына ұсынып отырмыз, – деді Катонқарағай МҰТП бас директорының орынбасары Раушан Қырықбаева.
Көрмеге қатысқан фотосуретшілердің ішінен В.Воробьевтің түсірген суреттері ерекше көз тартты. Ол көбінесе таудың биігінде жүретін аң-құстарды түсірумен айналысып келген. Таудың биігі демекші, құз-жартастарда жортатын қар барысының суреті де көрермен назарына ұсынылды.
– Көрмені емес, Алтай тауын аралап келгендей әсерде болдым. Біз білмейтін, біз көрмеген жерлер көп. Барып, тауына шықса шіркін. Десек те, көрмедегі фотолар ерекше әсер береді екен. Күнделікті смартфоннан көріп жүрсек те, көрменің жөні бөлек, – дейді студент Айым Болат.
Алтайды араламасаңыз да, көрмені көріп қайтуға әбден болады. А.Пушкин кітапханасы қызметкерлерінің айтуынша, фотокөрме бір ай бойы өскемендіктер мен қала қонақтарын қуантады.
Шығыс Қазақстан облысы
