Шырша жинауға шындап кірісті

Жаңа жыл мерекесі өтіп, славян халықтарының түсінігіндегі «ескі Жаңа жылды» шығарып салғаннан кейін, үйдегі жасыл шыршаның да «қызығы» қалмайды. Қалалықтардың бәрі оны қоқысқа шығарып тастайды. Содан көп қабатты үйлердің маңында төбе-төбе болып жас қарағайлар шашылып жататын. Облыстық «Наша газета» газетінің редакциясы ұйым­дастырған «Қош бол, шырша!» эко­логиялық акция­сынан кейін осы көріністі жұрт ұмытуға айнал­ды. Газет редакциясы бұл акция­ны 2004 жылы бастаған бола­тын. Олар қаланы таза ұстауға қа­лалықтардың назарын ауда­ру үшін сол жылы газет оқыр­ман­да­рын ұйымдастырып, 100 шырша жи­напты. – Келесі жылы қалалықтар акциямызды дуылдатып қолдап кетсін. 2005 жылы 1500 шырша жиналды, барлығын тізбесем де, кейінгі жылдарды айтайын. 2015 жылы – 4110, өткен жылы – 4421, биыл 4684 шырша жи­на­дық, – дейді газет редакторы Ольга Колоколова. Газет редакциясы бұл игілік­ті іске облыстық білім басқар­масын да тартады. Биыл «Қош бол, шырша!» акциясына қатыс­қан 12 білім ошағының арасынан №16 орта мектеп 1453 жас қарағай жинап, жеңімпаз атанды. Қала тазалығын сақтау ісіне жарияланған тендерден жұмыс ұтып алған «АВЗ» ЖШС жас қарағайларды сыртқа тасиды. – Олардың жүк машинасына бір тасығанда 115 жас қарағай сыяды. Сонда 4600-ден аса ағаш­ты қанша рет таситынын есептей беріңіз, – дейді Ольга Колоколова. Ал кесілген қарағайлар қоқысты көбейтпей, әрі қарай пайдаға асады. Оны жер үйде тұратындар кептіріп отқа, мон­шаға жағады, жолда қар тоқ­тату ісіне пайдаланылады, уақ мал­ға, қоянға витамині көп, тап­тырмайтын жем-азық­тығы тағы бар. Соңғы кезде әуесқойлар одан ағаш көмірін де дайындап жүр екен. Биыл қой өсірумен айналысатын кәсіпкер Есімхан Тәшетов әкесімен бірге 257 ағаш жинаған 1 сынып оқушысы Дарья Ермаковаға волейбол добын сыйлады. Жеңімпаз мектептердің оқушы­ларына демеушілердің көме­гімен кинотеатрға билет, конфеттер сыйға тартылды, ал­ғыс хаттар тапсырылды. Газет редакциясы 2010 жылы көрші Ресейде өткен «Ең үздік акция» байқауына қатысып, үшінші орын алған болатын. Ал өзімізде олар үшін игілікті іс же­ңімпаз болып отыр. Қостанай қаласы Қазақстандағы ең қолай­лы, таза қалалар үштігіне кіреді. Осындай экологиялық акцияның да оған қосқан үлесі бары сөзсіз. Нәзира ЖӘРІМБЕТОВА, «Егемен Қазақстан» ҚОСТАНАЙ