Халықаралық ұйымдар басшыларын марапаттады

Қазақстанның Вена қаласындағы халықаралық ұйымдар жанындағы тұрақты өкілдігі – еліміздің Австриядағы елшілігінде Атом энергиясы жөніндегі халықаралық агенттіктің (МАГАТЭ) бас директоры Юкия Амано мен Ядролық сынақтарға жаппай тыйым салу туралы шарт ұйымының (ЯСЖТШҰ) атқарушы хатшысы Лассина Зербоны Қазақстанның аталған ұйымдармен қарым-қатынасын дамытудағы қосқан үлесі үшін, Елбасы Нұрсұлтан Назарбаевтың Жарлығына сәйкес «Қазақстан Республикасының Тәуелсіздігіне – 25 жыл» мерекелік медалімен марапаттау рәсімі өтті, деп хабарлады Сыртқы істер министрлігінің баспасөз қызметі. Қазақстанның Австрия Рес­пуб­­ли­ка­сындағы Төтенше және өкі­летті елшісі, сондай-ақ, еліміз­дің Венадағы халықаралық ұйым­­дар жанындағы Тұрақты өкілі Қайрат Сарыбай шара бары­сын­да Қазақстанның ЯСЖТШҰ және МАГАТЭ-мен ты­ғыз байланыс орна­тып отыр­ға­нын, әсіресе, ядро­лық қару­ды таратпау мәселесінде тарап­тар­дың үлкен жетістіктерге жет­кенін атап өтті. Сондай-ақ, ол Мем­лекет басшысы Нұрсұлтан Назарбаевтың «Әлем. ХХІ ғасыр» мани­­фесінің маңыздылығына қа­ты­су­шылар назарын аудара ке­ліп, оның БҰҰ деңгейіндегі құ­жат ретінде танылғанына екпін берді. Өз кезектерінде марапат ие­лері Қазақстан халқын ел Тәуел­сіз­дігінің 25 жылдығымен құт­тық­тай келіп, Президент Н.Назарбаевқа өз қыз­меттерін оң бағалағаны үшін алғыс­­тарын жол­дады. Сондай-ақ, Қазақ­стан­ның халықаралық қауіп­сіздік­ті нығайтудағы маңызды рөлі мен ядролық қаруды таратпау мәсе­ле­сін­дегі белсенді іс-әрекетін атап көрсетті. Мәселен, Юкия Амано Прези­дент Нұрсұлтан Назарбаевтың бас­шылығымен Қазақстан қару­сыздану және ядролық қару­­ды таратпау ісіне зор үлес қос­қанын жеткізді. Осы орайда, Агент­­­тік­тің бас директоры елі­міз­­де Төмен байытылған уран банкін құру­дағы және Иранның ядро­лық бағ­дар­ламасы жөніндегі бір­лес­кен іс-әре­кеттер жоспарын жүзеге асы­ру­дағы зор үлесі үшін Қазақ­стан тарапына ризашылығын білдірді. Лассина Зербо өз кезегінде Пре­зидент Н.Ә.Назарбаевтың ядро­лық қарусыздану үдерісі шеңберіндегі Семей ядролық сынақ полигонын жабу туралы шешімінің маңыздылығын айта келіп, осы қадамның Ядролық сынақтарға жаппай тыйым салу туралы шартты қабылдауға негіз салғанын мәлім етті. Сонымен қатар, Лассина Зербо Қазақстан Ұйымның ең бел­­сен­­ді серіктесі екенін жеткізе оты­­рып, еліміздің Ядролық сы­нақ­­тарға жаппай тыйым салу туралы шарт­тың 14-бабы бойын­ша кон­фе­ренциясының тең төраға­сы ретін­дегі қызметін жо­ға­ры бағалады. Айта кетейік, марапаттау рәсі­­міне шет мемлекеттердің елші­лері, Австрияның сыртқы саясат ведомствосының, Венадағы ха­лық­аралық ұйымдардың, сон­дай-ақ, жергілікті бұқаралық ақпарат құралдарының өкілдері қатысты.