Өскемен қалдықтарды ғарыштан бақылайтын жобаға қатысуда

Қалдық тастап, қашып кететіндер енді жалтара алмайтын болды. Өскемен қаласы қалдықтарды ғарыш арқылы бақылайтын қанатқақты жобаға қатысып жатыр. Қазіргі уақытта облыстық экология департаментінде ғарыштық ақпараттармен жұмыс істейтін арнайы бөлім де құрылып үлгерген. -Біз тиісті аумақты белгілеп, ұсыным жібереміз. Төрт-бес күннің ішінде қалдықтардың орналасқан жері мен көлемі көрсетілген суретті аламыз. Тіпті, қалдықтардың құрамы мен қанша уақыттан бері жатқанын білуге де мүмкіндік бар, - дейді аталған департаменттің экологиялық бақылау бөлімінің жетекші маманы Рауан Мұсаева. Ғарыштық бақылау арқылы қаланың іші мен шаһардан 20 шақырым аумақтағы жерлерді де суретке түсіруге болады. Осы мәліметтер негізінде департамент қызметкерлері тексеріс жүргізіп, тиісті орындарға шағым түсіре алады. Облыс экологтары бұл жобаның алдағы уақытта бей-берекет тасталған қалдықтарды ғана емес, заңсыз салынған құрылыстар мен ағаш кесушілерді анықтауға да мүмкіндік беретініне сенімді. Департамент мамандары ғарыштық түсірілімдерді жаз айларынан бастап қолданысқа енгізуді жоспарлап отыр. Азамат ҚАСЫМ, «Егемен Қазақстан» ӨСКЕМЕН