Оңтүстік Қазақстанда жұмыссыз жастардың қатары артып барады

Шымкентте жоғары оқу орнын бітірген жас мамандар жұмыссыздардың санын арттырып отыр, деп хабарлады 24.kz. Техникалық білім алған студенттердің өзі мамандықтарын өзге салаға ауыстыруға мәжбүр. Ал «Серпін» бағдарламасымен еліміздің оңтүстігінен солтүстігіне аттанғандардың алды күнгейге қайта оралған. Кейбіреулері ауа райына бейімделе алмаған. Екі қолға бір күрек таппай жатқандар да бар. Жастар депутаттарға осы мәселелерді айтты. М. Әуезов атындағы Оңтүстік Қазақстан мемлекеттік университетінде өткен жиында Елбасының халыққа бағыттаған жолдауы мен үндеуі қатар талқыға салынды. «Бұл жолдауда негізгі мәселе – еліміздің экономикасын жаңа сатыға, жоғары деңгейге көтерілуі. Мұның ішінде бірнеше басым бағыттар көрсетілген. Алға қойылып отырған үлкен мақсат – еңбек өнімділігін арттыру. Жалпы ішкі өнімнің көлемін әлдеқайда өсіріп, ел эконмикасындағы көрсеткіштердің барлығы басқа дәрежеге көтеру қаралып отыр», – деді ҚР Парламенті Мәжілісінің депутаты Бақтықожа Ізмұхамбетов.