Мұз айдынына – 44 жыл

Алматыдағы «Медеу» мұз айдынының ресми түрде пайдалануға берілгеніне 44 жыл толды. Ол 1972 жылғы 28 желтоқсанда ашылған еді. Медеу – Іле Алатауы баурайында теңіз деңгейінен 1691,2 метр биікте орналасқан ірі спорттық кешен. Оның құрылысы 1949 жылдың күз айында басталып, алғашқы ресми ойындар 1951 жылдың 4 ақпанында өткен. Стадионға жасанды мұз тек 1972 жылы ғана төселді. Медеу – қысқы спорттық ойын­­дарға арналған мұз айдыны, жасанды мұз алаңының аумағы 10,5 мың шаршы метрді, ай­дын­д­ағы мұз жабындысының қалың­дығы 2,3 метрді құрайды. Тау бөк­теріндегі жайлы климат, күн ра­диа­циясының қолайлы дең­гейі, төмен ауа қысымы және таза тау суы мұздың жоғары са­п­а­лы болуын қамтамасыз ете­ді. Мұнда осы кезге дейін әлем­­нің 120-дан астам рекорды жаңар­тылды. Мұз айдыны 2011 жылғы VІІ қысқы Азия ойындары қарсаңында қайта жөндеуден өтті. Спорттық ойындар­дың нәтижелерін көрсетуге, телеви­зиялық бағдарламаларды, тақырыптық және жарнама­лық роликтерді трансляциялау­ға мүмкіндік беретін алаңы 200 шаршы метрлік жаңа мультимедиялық тақта орнатылды. Қайта жөндеуден кейін мінбелердегі отырғыштардың саны артып, 7200-ден 8500-ге жетті. Жаңадан орнатылған қазіргі заманғы тоңазытқыш құрыл­ғылары мұзды 1 қазаннан 1 сәуірге дейін ұстап тұрады. Бір мезгілде мұз айдынына 2 мыңнан 3 мыңға дейін адам сыяды. Демалыс күндері конькимен сырғанау көптеген жылдар бойы тек тұрғындар емес, қала қонақтары үшін де жақсы дәстүрге айналған. «Медеу» атауы ХІХ ғасыр­дың соңында өмір сүрген қоғам қайраткері, қазақ халқын көш­пелі отырықшылыққа бейімдеу жұмыстарымен айна­лысқан, қазақ балаларына арнап пансионат ашқан Медеу Пұсырмановтың құрметіне берілген. «Медеудің» айналасын 21 мың гектар орман-тоғай алқабы қоршап жатыр. Онда қайың, көктерек, қарағай мен шырша, долана, шетен ағаш­тары өседі. Мұз айдынынан бөлек, мұнда Ғарыш сәулелері ғылыми стансасы, Үлкен Алматы көлі, Жоғарғы Горельник сар­қырамасы, Алматыны селден қорғап тұратын бөгеттер, Тер­рен­кур және сегіз жүзден астам сатысы бар баспалдақ бар. Алдағы жылғы 29 қаңтар мен 8 ақпан аралығында Ал­маты­­да ойналатын XXVIII қы­с­қы Универсиада ойындары жарыс­тарының бір бөлігі «Медеу» мұз айдынында өтеді. Талғат РАЙЫМБЕК, «Егемен Қазақстан»