Көрме билеті қолжетімді

Көкшетау қаласындағы «RIO» сауда-сауық орталығында ЭКСПО-2017 халықаралық мамандандырылған көрмесіне кіру билеттерін сататын касса ашылды. Енді көрермендер Астанаға сабылмай, жергілікті жерде билет сатып ала алады. Арнайы көрме кассасының есепшісі Әйгерім Бекмағамбетованың айтуынша, үстіміздегі жылдың 8 наурызы мен 10 қыркүйегі аралығында аталған билет сату орны демалыссыз жұмыс істейтін болады. Бұл ретте Ұлы Отан соғысының ардагерлері, мүмкіндігі шектеулі жандар және жетім балалар көрмені тегін тамашалауға мүмкіндік алып отырғандығын айта кеткен жөн. Ал мектеп оқушыларына студенттерге, зейнеткерлер мен көпбалалы отбасыларға 50 пайыздық жеңілдік қарастырылған. Көкшетауда ашылған кассадан алған билет алушылардың бірі Гүлжиһан Сейт­қасымова өзінің әсерімен бөлісе келіп, былай деді: «Мен қаламызда осын­дай тұрғындарға ыңғайлы орында ЭКСПО-2017 кассасының ашылуына қуа­ныштымын. Мамандандырылған көрме еліміздің халықаралық аренада танымал болуына жол ашады. Айтпақшы, билеттерді сайт арқылы сатып алуға болады екен. Сондай-ақ, билеттер «Меломан» дүкендер желісінде және «Қазпошта» бөлімшелерінде сатылуда. Асқар ТҰРАПБАЙҰЛЫ, «Егемен Қазақстан» Ақмола облысы