Ауғанстан президентінің қолдауы

Ауғанстан президенті Мохаммад Ашраф Ғани Қазақстанда жүргізіліп жатқан саяси реформаларға қолдау білдірді. Бұл туралы еліміздің сыртқы саясат ведомствосының баспасөз қызметі хабарлады. Жуырда Қазақстанның Ауғанстан­дағы Төтенше және өкілетті елшісі Өмір­тай Бітімов Ауғанстан Ислам Рес­пуб­ликасының президенті Мохаммад Ашраф Ғанимен кездесті. Кездесу барысында қазақстандық дипломат Ауғанстан президентіне «Қазақстан Республикасының Тәуелсіздігіне – 25 жыл» мерейтойлық медалін тапсырды. Сонымен қатар, ол Мохаммед Ашраф Ғаниге Шанхай ынтымақтастық ұйымының саммитіне және Ислам ынтымақтастығы ұйымының Астанада өтетін ғылым және технологиялар жө­нін­дегі саммитіне шақыруды табыс етті. Өміртай Бітімов Ауғанстан прези­дентін Қазақстандағы маңызды саяси-экономикалық үдерістермен және Мемлекет басшысының бастамасымен қолға алынған басқа да басымдықтармен таныстырды. Сондай-ақ, Елбасының халыққа арнаған «Қазақстанның Үшінші жаңғыруы: жаһандық бәсекеге қабілеттілік» атты Жолдауы туралы да жан-жақты әңгіме қозғады. Өз кезегінде А.Ғани Қазақстан Пре­зи­дентіне құрметті марапаты үшін алғысын білдірді. Ол «Қазақстан Көш­бас­шысының мемлекеттік басқару рефор­масына қатысты алысты көздеген, қазақс­тандық қоғам институттарының одан әрі дамуына ықпал ететін жос­парларын» Ауғанстанның жоға­ры баға­лайтынын, оны әрдайым қолдай­тынын жеткізді. Қазақстан елшісі мен Ауғанстан президенті екіжақты ынтымақтастықты одан әрі дамытудың өзекті мәселелерін, атап айтқанда, сауда-саттық сала­сын­дағы мәселелерді, Қазақстанның астығын, Ауғанстанның көкөнісі мен жеміс-жидегін екі жаққа тасымалдау барысын, темір жол тасымалын дамыту жолдарын, екі ел арасындағы тауар айналымының көлемін ұлғайтудың жай-күйін талқылады.