«Сарыарқа» мен «Торпедо» – ширек финалда

Жоғары хоккей лигасының плей-офф кезеңінде өнер көрсетіп жатқан қазақстандық қос клуб – Қарағандының «Сарыарқасы» мен Өскеменнің «Торпедосы» қарсыластарынан басым түсіп, келесі раундқа шықты. Қарағандыда өткен ойында «Сарыарқа» Чеховтің «Звезда» командасын қабылдап, 5:0 есебімен ойсырата жеңді. Төрешінің ысқырығы естіле сала алға ұмтылған айдын иелері қарсыластарын бірден қысымға ала жөнелді. Орайы келген тұс­тарда қауіпті соққыларын да жау­дырып жатты. Алайда, шабуыл­да қаншалықты сес көрсетсе де, алғашқы голды тек бірінші ке­зең­нің соңғы минутында салды. Ойыншы басымдығын тиімді пайдаланған қарағандылықтар Михаил Анисиннің көмегімен алға шықты. Ойынның келесі бөлігі де дәл осы бағытта өрбіді. 30-минутта Дмитрий Желнеровский бағыттаған соққы қарсы қақпаның торынан бір-ақ шықты. Үшінші кезең «Сары­арқа» үшін аса сәтті өтті. 52-минутта Дмитрий Желнеровский ойын­дағы екінші шайбасын салса, араға төрт минут салып, Нериус Алишаускас есептегі басымдықты арттыра түсті. Ал 58-минутта Антон Сагадеев кездесудегі соңғы голдың авторы атанды. «Сарыарқа» осылайша «Звезда» клубын жалпы есепте 4:1 етіп же­ңіп, Жоғары хоккей лигасы плей-офф кезеңінің ширек финалына жолдама алды. Осы сында «Торпедо» командасы өз айдынында «Ижсталь» ұжымымен кездесіп, 3:2 есебімен басым түсті. Матчтағы алғашқы шайба 14-минутта соғылды. Денис Игна­шин мергендігімен танылып, шығысқазақстандықтарды алға шығарса, 28-минутта Антон Кочуров екінші шайбаның авторы атанды. Арада алты минут өт­кенде қонақтар сапынан Леонид Метальников есеп айырмашылығын қысқартты. Кездесудің үшінші кезеңінде қос команда бір-бір голдан соқты. Алдымен, Талғат Жайлауов 47-минутта «Торпедоның» үшін­ші голын салса, 58-минутта Ки­рилл Князев соңғы нүктені қой­ды. «Торпедо» командасы сериялы матчта төртінші рет жеңіске жетіп, ширек финалға шықты. Аян ӘБДУӘЛИ, «Егемен Қазақстан»