«Барыс» ширек финалға шықты

Құрлықтық хоккей лигасының плей-офф кезеңінде бақ сынап жүрген Астананың «Барыс» хоккей клубы кезекті табысымен жанкүйерлерін қуанышқа бөледі. Челябінің «Трактор» командасымен 1/8 финалдың алтыншы ойынында күш сынасқан жерлестеріміз 2:1 есебімен жеңіске жетіп, жалпы есептің қорытындысы бойынша турнирдің ширек финалына жолдама алды. «Барысты» жарыстың келесі кезеңіне алып шыққан алтыншы матчта есепті қонақтар ашты. Ойын­ның 10-шы минутында Ки­рилл Кольцов дәл соққымен «Тракторды» алға шығарған бо­латын. Екінші кезеңнің басында «Барыстың» хоккейшісі Вла­ди­мир Маркелов қарымта гол соғып, таразы басын теңестірді. Ал соңғы кезеңде қонақтардың аз құраммен ойнаған сәтін ұтымды пай­далана білген астаналықтар жеңіс шайбасына қол жеткізді. Голдың авторы – Дастин Бойд (43-минут). Сөйтіп, алты ойын қоры­тындысы бойынша жалпы есепте 4:2 есебімен жеңіске жеткен «Барыс» турнирдің ширек финалына жолдама алды. Енді олар 1/8 кезеңінде Қытайдың «КуньЛунь Ред Стар» командасын жарыс жолынан шығарған Магнитогорскінің «Металлург» клубымен плей-оффтың 1/4 финалында күш сынасатын болады. Қайрат ӘБІЛДИНОВ, «Егемен Қазақстан»