Қарқынды дамуға бастайтын тарихи қадам

Елімізде демократиялық даму жолында бір көптен күткен қадам жасалды. Тоқсаныншы жылдардағы Қазақстан есімізде. Айтыс-тартыс Парламенттің ішінде де, сыртында да жүріп жататын. Істен сөз көп болатын. Халық қит етсе митингілеп, көшеге шығатын. Өйткені, бізге, отарлық қамы­тынан кеше ғана құтылған елге дамыған капитализмді дереу орнату қажет болды. Бірақ, ол «жұмақты» бір күнде орнатуға экономикалық та, саяси да шама жоқ-тын. Қашан орнайды деп күтіп отыруға тағы болмайтын. Қарны ашқан халықтың Үкіметке бас салуы да ғажап емес еді. Сол аласапыранды болдырмау үшін шұғыл шешім қабылдайтын Үкімет керек болды. Сондықтан да Прези­дент Парламенттің де, Үкіметтің де негізгі билігін өз қолына алды. «Диктатура!» деген айқайлар шықты. Іштен де, сырттан да. Алайда, халық Назарбаевқа сенді. Өйткені, ол бұған дейін Үкі­метті талай жыл басқарып, сенім­ге ие болған. Сонымен қатар, ол еліміздегі көп ұлтты шаруа халық­пен де, жұмысшы халықпен де ортақ тіл таба білетін туған топы­рақ­тың төл перзенті еді. Сол тұсқа сай бұл таң­дау, президенттік биліктің бірден-бір дұрыс таңдау болғанын тарих дәлелдеді. Қазақстан шаруашылығы тұралап қалған елден 25 жыл ішінде әлемнің алдыңғы қатарлы 50 елінің санатына шықты. Аймақтық көшбасшыға айналды. Енді осы тұста Президент қолына шоғыр­ланған биліктің белгілі бір бөлігін Пар­ламент пен Үкіметке қайтарып беруге шешім қабылдады. Ата Заңға өзгерістер ұсынылды. Парламент бұл өзгерістерді мақұлдады. Енді Парламенттің де, Үкіметтің де рөлі күшейді. Бірақ, бұл деген сөз, президенттік билікті әлсірету емес, біздіңше. Биліктің парламенттік және үкіметтік тармақтарын күшейту ғана. Олардың жауапкершілігін күшейту. Бұл – дамыған демократиялық елдер тәжірибесі. Бұл ұсынысты Қазақстанды бұрынғыдан да қарқынды дамуға бастайтын тарихи қадам деп білеміз. Смағұл ЕЛУБАЕВ, жазушы АЛМАТЫ