ШҚО-да «Мұз астынан балық аулау-2017» сайысы өтті

Шығыс Қазақстанның балықшылары Жарма ауданына былтыр да жиналып еді. Биыл тағы да бас қосты. Аудан әкі­мінің жүлдесі үшін ұйым­дастырылған «Мұз астынан балық аулау-2017» сайысына облыстың түк­пір-түкпірінен келген жет­пістен астам балықшы қатысты. – Қыстыгүні балық аулау оңай шаруа емес. Шеберлік пен ептілікті қажет етеді. Турнирге алыс-жақыннан ат арытып келген барлық балықшыларға алғыс айтамыз, - деді шараның ашылу салтанатында сөз алған Жарма ауданының әкімі Нұрлан Сыдықов. «Қарамай-ақ жауынға, той басталды ауылда» дегендей, бұл күні өңірдің қармақтың құла­ғында ойнаған 70 балықшысы күннің суықтығына да қара­мастан бетін мұз бүркеген Шаян­ды көлінің әр тұсынан ойық жасап, қармақ салып, ба­лық аулап, бәсекенің көрігін қыз­дыр­ды. Бәрінің де көңілі көтеріңкі. – Мұз ойып, қармақпен балық аулаудың өзі бір рақат дүние ғой. Мұны қысқы спорттың бір түрі десек те болады. Күнделікті күйбең тіршіліктен құтылып, та­за ауаға, табиғат аясына шық­қанға не жетсін?! Өзім жиі болмаса да, анда-санда қармақ салуға шығып тұрамын. Әуесқой балықшылардың басын қосып, осындай сайыс ұйымдастырған азаматтарға алғыс білдіреміз, – дейді Ермек есімді жарысқа қатысушы. Шара соңында жеңімпаздар мен жүлдегерлерге аудан әкі­мінің марапат қағаздары мен бағалы сыйлықтар табыс етілді. Азамат ҚАСЫМ, «Егемен Қазақстан» Шығыс Қазақстан облысы