«Ақ бұлақтың» алғашқы жобасы ауылда жүзеге асты

Маңғыстау халқы үшін ауыз су – маңызды мәселе. Өңір тұрғындарының алып су айдынының жағалауында отырып ауыз суды армандауы да – үйреншікті құбылыс. Себебі, өңірде су көздерінің тапшылығы мен теңіз суының тұздылығы мәселені басқаша шешуге мәжбүрлейді. «Ақ бұлақ» мемлекеттік бағдар­ламасының жемісі облыстың ең шалғай, халқы көп ауданы Бейнеу ауданында жүзеге асып, кентте су тазарту кәсіпорыны іске қосылды. Кәсіпорынның міндеті – Еділ өзенінен келген суды тазартып, халықты ауыз сумен қамту. Мекемедегі сыйымдылығы 45 мың текше метр болатын бес бірдей сүзу қазандықтары тәулігіне 12 мың текше метр суды өңдейді. Су алдымен тұшытылып, одан соң бірнеше рет сүзгіден өткізіліп, әбден тазартылады. Әр тәулік сайын тазартылған, ішуге жарамды су құбыр арқылы тұрғындарға таратылады. Замана талаптарына сай жаңа технологиямен жабдықталған кешендегі құрылғылардың жартысынан көбі, яғни 60 пайызы отандық өнім болса, техниканың 40 пайызы шетелдік қондырғылар. Мердігер Асқар Керелбаевтың айтуын­ша, су тазарту кәсіпорны Маңғыстау об­лысы аудандарының ішінде бірінші рет Бейнеу ауданында жүзеге асырылған. 2014 жылы басталған жұмысты 2016 жылы аяқтаған. Жаңа құрылыстың құбырлары үш елді мекенге тартылған, тағы екі елді мекенге жақын арада құбыр жүргізіледі. Құбырмен жеткізілетін су үйді-үйге кезең-кезеңімен жеткізілетін болады, демек бейнеуліктер үшін су таситын көліктерге тапсырыс беріп, кезек күтетін күндер артта қалатын кез алыс емес. Гүлайым ШЫНТЕМІРҚЫЗЫ, «Егемен Қазақстан» Маңғыстау облысы Суретті түсірген Серік МАЙЕМЕРОВ