Астана процесінен 389 шетелдік журналист хабар таратады

Астана процесінен 320 шетелдік журналист хабар таратады. Бұл туралы бүгін ҚР Сыртқы істер министрінің орынбасары Роман Василенко айтты. «БАҚ өкілдері келіссөздер басында ғана фото және видео түсірілімге жіберіледі. Өйткені, оның негізгі бөлігі жабық режімде өтеді. Өздеріңізбен бірге байқап отырғанымыздай, қазіргі уақытта Астанадағы сирияаралық келіссөздерге (Астана процесі) халықаралық қоғамдастықтың қызығушылығы өте жоғары. Жаһандық қауіпсіздік үшін сириялық дағдарыстың өзектілігін ескерсек, бұл барынша күтілген жайт», - деді ол. Оның айтуынша, Астана процесінен хабар тарату үшін тіркелген шетелдік және қазақстандық бұқаралық ақпарат құралдарының өкілдері өте көп болды. «Біз 320 шетелдік және 120 қазақстандық журналисті тіркедік. Олар Ақпарат және коммуникациялар министрлігі «Қазмедиа» ғимаратында арнайы ұйымдастырған баспасөз орталығында жұмыс істейтін болады. Дәл сол жерде кездесудің ашылу рәсімі тікелей көрсетіледі», - деді Василенко. Келіссөздер басталған кезде «Бүгінгі келіссөздердің бірқатар модальдылығы бойынша баспасөз мәслихатын өткіздім және маңызды түзету жасау қажет. Мен мәлім еткендей, аккредиттелген шетелдік БАҚ саны 320 емес - 389. Шетелдік БАҚ  саны бойынша бұл менің есімде қалған ЕҚЫҰ саммитінен кейінгі екінші көрсеткіш», - деді ол. Сонымен қатар ол кездесуге қатысушылар қорытынды баспасөз мәслихатын өткізетін болса, ол да «Қазмедиа» орталығында ұйымдастырылатынын айтты.