Жеңімпазға рух берген

Алматыдағы Достық үйінде Қазақстан халқы Ассамблеясының қолдауымен «Қазақстан – тек алға!» атты жастардың патриоттық акциясы өтті Елбасымыз – Қазақстан Республикасының Тұңғыш Президенті Нұрсұлтан Назарбаев Астанада өткен Тәуелсіздіктің 25 жылдық мерейтойында жа­­саған баяндамасында бей­­бітшілік елшісіне айнал­ған спортшыларымыз тура­лы­ тебірене сөйлегені ха­лық­тың­ есінде. Сонда ел спорт­шы­­ларының атынан жауап сөз айт­қан Олимпиада чемпиондары Дми­трий Баландин мен Данияр Елеусіновтің сөзіне Елбасымыз да, жиналған халық та зор зейін қойды. «Құрметті Нұрсұлтан Әбішұлы! Өзіңіздің «Қазақстан – алға!» деген сөзіңізді елі­міздің ресми ұранына айнал­ды­ру ниетіміз бар. Бұл барша қазақстандықтардың мәңгілік ұранына айналар еді», – деді Олим­пиада жеңімпаздары. Мерекелік жиынға қатысушылар қошемет танытып, Елбасының өзі Даниярдың атын атап, бұл ұранды қолдайтынын білдірген болатын. Содан бері еліміздің әр аймақтарында осы бағыттағы патриоттық игі шараларда бұл ұран көтеріңкі леппен айтылып келеді, қолдау шаралары ұйым­дастырылуда. Республикалық «Жарасым» жастар бірлестігінің Алматыда өтетін ХХVІІІ Дүниежүзілік қысқы Универсиада қарсаңында жоғарыдағы салтанатты елі мен Елбасы қолдаған шараға үйлестіріп өткізуі де тектен-тек емес. Қазақстан жастары арасында Отанға деген патриотизм мен ауызбірлікті нығайту бүгінгі жиынға басты ұран етіп алынуы да сондықтан. Жастарға үлгі болып жүрген танымал спорт саңлақтары жиналғандар алдында жігерлі сөз сөйлеп, спортшыларымызға жеңіс тіледі, жастарымыздың жүрегіне отаншылдық сезім қонуын тіледі. Олардың арасында Қазақ­стан альпинистері құрама коман­дасының капитаны, әлемге та­нымал альпинист Мақсұт Жұ­маев, грек-рим күресінен Олим­пиада чемпионы Юрий Мель­ниченко, кикбоксингтен әлем чемпионы Михаил Нәдіров және басқалар бар. Қазақстанның атынан ұлы дүрмек – «Универсиада-2017» қысқы ойындар спортшыларына рух берген салтанатты жиынға қоғам қайраткерлері мен мем­лекеттік органдардың өкілдері, этномәдени бірлес­тіктердің жетекшілері мен спортшылар, студент жастар қатысты. Жи­налған қауым болашағы жар­қын жас мемлекетіміздің тек спортта ғана емес, еліміздің дамуының барлық саласында үнемі алда болатынына сенім білдірді. «Қазақстан – тек алға!» деген ұран айтылды. Талғат СҮЙІНБАЙ, «Егемен Қазақстан» АЛМАТЫ