2018 жылы Қазақстанда жергілікті өзін-өзі басқаруға дербес бюджет енгізіледі

2018 жылдан бастап Қазақстанда жергілікті өзін-өзі басқаруға дербес бюджет енгізу жоспарлануда. Бұл туралы бүгін Парламент Мәжілісінің жалпы отырысында ҚР ұлттық экономика министрі Тимур Сүлейменов мәлімдеді. «Халықаралық тәжірибе көрсеткендей, жергілікті өзін-өзі басқару жүйесін дамыту - экономикалық өркендеудің, әлеуметтік әл-ауқат пен азаматтық қоғамды қалыптастырудың бірден-бір шарты болып табылады. Қазақстанда Жергілікті өзін-өзі басқаруды дамыту тұжырымдамасы қабылданған. Оның негізіне Жергілікті өзін-өзі басқарудың еуропалық хартиясында бекітілген муниципиалдық демократия мен муниципиалдық басқарудың жалпыға бірдей танылған құндылықтары салынған», - деді ведомство басшысы. Осы тұжырымдамада Қазақстан Республикасындағы жергілікті өзін-өзі басқаруды дамыту екі кезеңге бөлінген: Бірінші кезең (2013-2014 жылдар) - басқарудың төменгі деңгейлеріндегі қолданыстағы жүйенің әлеуетін кеңейту; Екінші кезең (2015-2020 жылдар) - жергілікті өзін-өзі басқаруды одан әрі дамыту. «Сіздерге ұсынылып отырған Жергілікті өзін-өзі басқаруды дамыту мәселелері жөнінде заң жобасында (бұдан әрі-заң жобасы) жергілікті өзін-өзі басқарудың дербес бюджеті мен коммуналдық меншігін енгізу, жергілікті өзін-өзі басқару органдарының бюджет процесі мен коммуналдық меншікті басқарудағы өкілеттіктерін кеңейту көзделген. Заң жобасымен Бюджет, Салық және Азаматтық кодекстерге, «Мемлекеттік мүлік туралы», «Қазақстан Республикасындағы жергілікті мемлекеттік басқару және өзін-өзі басқару туралы», «Жарнама туралы» Қазақстан Республикасының Заңдарына өзгерістер мен толықтырулар енгізіледі», - деді министр.