Балаларға қамқорлық

Ата-ана қамқорлығынсыз қалған балалар қашанда көмекке зәру. Бұл бағытта облыста жақсы жұмыстар жасалуда. Соның ең бастысы – оларды тұрғын үймен қамтамасыз ету. Ата-ана қамқорлығынсыз қалған бала­ларға арналған әлеуметтік үй облыс орталығының Кірпішті елді меке­нінде салынатын болды. Оған «Сәби» қоғамдық қоры есебінен 1,2 млрд. теңге бөлінеді деп күтілуде. Әлеу­меттік үйде 80 адам, оның ішінде мүм­кіндігі шектеулі балаларға арналған интернаттың түлектері тұратын болады. Оларға бөлек пәтерлер беріледі. Салынып жатқан әлеуметтік үйдегі бір пәтердің жалпы ауданы 40 шаршы метр. Тұрғын үйге жақын маңда денсау­лығында ақауы бар тұрғын­дарға жалақы алуға мүмкіндік беретін шағын цех құрылысы жүріп жатыр. Нақ­тырақ айтқанда, кондитерлік өнімдер шығаратын, аяқ киім жөн­дейтін цех, тігін цехы, ұстахана және жөндеу цехы, сонымен бірге, шаштараз бен массаж орталығы пайдалануға берілді. Әлеуметтік үйде сауықтыру құрал-жабдықтары, релаксация залдары болады. – Біз балалар үйлері мен маман­данды­рылған мектеп-интернат түлектерінің тағдырын бақылауда ұстап, оларға жан-жақты көмек көрсетуіміз керек. Ең бастысы – жұмыспен және баспанамен қамтамасыз ету. Ол үшін барлық күшті салу қажет, – деп атап өтті өңір басшысы. Қазіргі таңда Ақтөбе облысында 70 орынға есептелген Жасөспірімдер үйі жұмыс істейді. Облыстық интернат мекемелерінің түлектері онда 23 жасқа дейін тұра алады. Ал әлеуметтік үйде 16-29 жас аралығындағы түлектер тұрады. Сатыбалды СӘУІРБАЙ, «Егемен Қазақстан» Ақтөбе облысы