БАҚ саласы бойынша Елбасы марапаттарының сыйақы көлемі белгілі болды

АСТАНА. 19 мамыр. Мемлекет басшысының 2015 жылғы БАҚ саласындағы сыйлықтары мен гранттарын, сондай-ақ, Алғысын алуға үміткерлерден ұсынымдар қабылдау жалғасуда. Бұл туралы akorda.kz хабарлады. Ақшалай сыйлықтардың көлемі – 2 миллион 200 мың теңге, грант көлемі – 1 миллион 764 мың теңге. Сыйлықтар мен гранттар алуға үміткерлерді бұқаралық ақпарат құралдары, шығармашылық одақтар, қоғамдық бірлестіктер, мемлекеттік органдар ұсына алады. Алғыс жариялауға шығармашылық ұжымдарды шығармашылық одақтар, қоғамдық бірлестіктер, мемлекеттік органдар ұсына алады. Әрбір бұқаралық ақпарат құралы, шығармашылық одақ, қоғамдық бірлестік, мемлекеттік орган сыйлықтар мен гранттар алуға екі үміткер ғана ұсынуға құқылы. Сыйлықтар, гранттар алуға үміткерлердің және Алғыс жариялауға шығармашылық ұжымдардың өзін-өзі ұсынуына жол берілмейді. Сыйлықтар немесе гранттар алуға бұқаралық ақпарат құралының, шығармашылық одақтың, қоғамдық бірлестіктің, мемлекеттік органның ресми бланкісіне жазылған, бірінші басшы немесе оның орнындағы адам қол қойған (А4 форматтағы көлемі 2 парақтан аспайтын) ұсыным жолданады. Оған мынадай құжаттар қоса ұсынылады: – сыйлықтар немесе гранттар алуға ұсынылған үміткердің аты, әкесінің аты, тегі және шығармашылық бүркеншік есімі (егер болса), сондай-ақ, атқаратын лауазымы көрсетілген негізгі жұмыс орнынан анықтама; – сыйлықтар немесе гранттар алуға ұсынылған үміткердің шығармашылық қызметінің қысқаша сипаттамасы; – жарияланымдар мәтіндері немесе аудио және (немесе) бейнематериалдар; – негізгі жарияланымдарының тізімі және (немесе) олардың көшірмелері. Алғыс жариялауға шығармашылық одақтың, қоғамдық бірлестіктің, мемлекеттік органның ресми бланкісіне жазылған бірінші басшы немесе оның орнындағы адам қол қойған бұқаралық ақпарат құралының қызметі туралы (А4 форматтағы көлемі 2 парақтан аспайтын) ұсыным ұсынылады; Конкурсқа мән-маңызы жоғары негізгі жарияланымдар немесе аудио және (немесе) бейнематериалдар ұсынылады. Қарауға 2014 жылғы 1 маусым мен 2015 жылғы 1 маусым аралығында жарияланған және (немесе) эфирге шыққан материалдар қабылданады. Сыйлықтар, гранттар алуға және Алғыс жариялауға ұсынылған материалдар мен құжаттар қайтарылмайды. Кітаптар БАҚ саласындағы наградалар алуға ұсынылған материал ретінде қарастырылмайды. Мерзімді басылымдарда жарық көрген мақалалар топтамасын ұсынуға болады. Мемлекет басшысының сыйлықтарын, гранттарын алуға және Алғысын жариялауға ұсынымдарды Қоғамдық комиссияның төрайымы – Қазақстан Республикасының Мемлекеттік хатшысы Гүлшара Әбдіқалықованың атына мына мекенжай бойынша: 010000, Астана, Сол жағалау, «Ақорда» Резиденциясына 2015 жылғы 5 маусымға дейін жолдау қажет. Еламан Қоңыр. Дерек: akorda.kz. Сурет: alau.kz.