Батыс Қазақстанда Жәңгір ханның көзіндей болған орман оталуда

ОРАЛ. 18 мамыр. Батыс Қазақстан облысы Бөкей ордасы ауданы Орда ауылында кезінде хан Жәңгірдің бастамасымен отырғызылған қарағайлы орман бар. Бархан құмның ортасынан орын тепкен орман бүгінге дейін сақталып келген еді. Өкінішке қарай, қазіргі таңда сол жердегі қарағайлар кесіліп жатыр. Бұл туралы egemen.kz тілшісі хабарлады. Орда орман шаруашылығы аумағында болып жатқан жайттарды бізге облыс орталығынан шалғайда жатқан сол ауылдан арнайы келген зейнеткер, ауданның құрметті азаматы Есентай Нұрлыбаев ашына айтып берді. Тіпті ол оталған, оңды-солды кесілген орманның суреттерін қоса көрсетті. Есентай ақсақалдың айтуынша, осы жайтқа қатысты Орда орман шаруашылығының басшылығы нақты бір шара қолданбай отырған көрінеді. Ал қарағайларға қырғидай тигендер оны электр арасының күшімен тақта етіп тілдіріп, үйдің құрастырмалы бұйымдарын жасап, сатуды әдетке айналдырған. «Бұрын әкімшілік құқықбұзушылық болып саналған ағаштар мен екпе ағаштарды заңсыз кесу – қазіргі таңда, Орман кодексіне енгізілген өзгерістерге сәйкес, қылмыстық құқықбұзушылыққа жатады», – дейді ел ағасы. Сондай-ақ, ол: «XIX ғасырдың алғашқы ширегінде қолдан отырғызылған орманды отамай, аялап, кейінге ұрпаққа аманаттасақ, әлдеқайда абыройлы іс болар еді. Тарихтың жаңғырып, санамызда қайта оянуына да көне жәдігердей болған осындай жауһарларымыздың септігі мол. Ендеше орманның оталуына жол бермейік», – деді. Темір Құсайын. Дерек, сурет: egemen.kz.