Фото: yandex.kz
Түзетулерге сәйкес, әділет органдарының өкілеттігі кеңейтіледі. Сонымен қатар нотариус лицензиясының қолданысын 6 айға дейін тоқтата тұрудың қосымша негіздері енгізіледі.
Мұндай шаралар нотариус «Дербес деректер және оларды қорғау туралы» заң талаптарын бұзған жағдайда қолданылуы мүмкін.
Сондай-ақ лицензияның қолданысын уақытша тоқтата тұрудың жаңа негіздері айқындалды. Атап айтқанда:
– нотариус мемлекеттік қызметте болған кезде;
– Қазақстан Парламентінің депутаты немесе тұрақты негізде қызмет атқаратын, мемлекеттік бюджеттен қаржыландырылатын мәслихат депутаты болып сайланған кезеңде лицензияның күші тоқтатыла тұрады.
Жаңа заң: Жеке деректерді заңсыз пайдаланған нотариустар лицензиясынан айырылады
Заң жобасында электрондық құжаттар мен электрондық цифрлық қолтаңба талаптарын бұзған нотариустарды лицензиясынан айыру мәселесі де қарастырылған.
Құжатта нотариалдық электрондық архив құру тәртібі де нақтыланады. Бұдан бөлек, нотариат қызметімен айналысуға лицензиясы бола тұра, 5 жылдан астам уақыт мамандығы бойынша жұмыс істемеген азаматтарға міндетті біліктілікті арттыру талабы енгізіледі.
Депутаттардың пікірінше, бұл өзгерістер нотариат саласындағы жауапкершілікті күшейтіп, азаматтардың құқықтарын қорғау тетіктерін жетілдіруге мүмкіндік береді.
Еске салайық, Мәжілістің жалпы отырысында депутаттар Салық кодексіне өзгерістер енгізу туралы заң жобасын бірінші оқылымда мақұлдады.
