Фото: Видеодан алынған кадр
Орталық саябақты басқаратын компания директоры Ғани Хасеновтің айтуынша, аттракцион тетіктерінің арасына бөгде зат түсіп кеткен. Соның салдарынан механизм істен шығып, кабина құлаған.
«Механизмге бөгде зат түскен. Қазір оның толық техникалық шешімін таптық, енді мұндай жағдай қайталанбайды. Аттракцион шағын болғандықтан, ешкім ауыр жарақат алған жоқ», деді ол.
Басшылықтың мәліметінше, осыған ұқсас ақау аталған құрылғыда бұрын-соңды тіркелмеген. Қазіргі уақытта аттракционның жұмысы тоқтатылды, қайта толық техникалық тексерістен өткеннен кейін ғана іске қосылады. Әкімшілік барлық аттракцион күн сайын таңертең міндетті тексерістен өтетінін атап өтті.
Оқиға туралы ақпарат алдымен әлеуметтік желілерде тараған. Қала тұрғынының айтуынша, 25 сәуір күні сағат 17:10 шамасында бірнеше айналым жасағаннан кейін екі қызы отырған кабина кенет үзіліп кеткен.
«Қыздарымды басып қала жаздады» деп жазған тұрғын қаладағы барлық аттракционның техникалық жағдайын тексеруді талап етті.
