Премьер-министрдің орынбасары Қанат Бозымбаевтың төрағалығымен өткен отырыста Энергетикалық және коммуналдық секторларды жаңғыртуға арналған ұлттық жоба пысықталды. Онда инфрақұрылымдық бастамаларды қаржыландыру, есепке алу құралдарын орнату, цифрлық шешімдерді енгізу шарасы талқыланды. Су жүйелерін басқаруда жаңа технологияларды сынақтан өткізуге арналған пилоттық жобалар да күн тәртібіне шықты.
Қазір ұлттық жоба аясында құпталған бастамалардың жиынтық құны 974 млрд теңгеге жетті. Оның 34-і іске асыру кезеңінде тұр. Тағы 130 жоба EPC-мердігерлерді анықтау сатысында. Бұдан бөлек, 145 жоба іріктеудің түрлі кезеңдерінен өтіп жатыр. Бұл инфрақұрылымды жаңарту үдерісі кең ауқымда жүріп жатқанын аңғартады.
Өңірлердің жобаға дайындық деңгейі сараланып, арнайы рейтинг түзілді. Алдыңғы қатарда Алматы қаласы, Қарағанды облысы мен Алматы облысы көрінді. Маңғыстау мен Ұлытау облыстары әзірлік қарқыны баяу аймақтар қатарында қалды. Мұндай бағалау жүйесі жергілікті биліктің жауапкершілік деңгейін нақты айқындауға бағытталған.
Ұлттық жоба шеңберінде кәріздік-тазарту құрылыстарын салу мен жаңарту жұмыстары да жалғасып келеді. Қазіргі сәтте 16 жоба толық іске асыруға дайын. Тағы 6 бастама пысықтау кезеңінде тұр, жергілікті атқарушы органдар түпкілікті шешім қабылдауы қажет. Бұл нысандар қалалардағы экологиялық қауіпсіздік пен санитарлық жағдайды жақсартуға ықпал етеді.
«Бәйтерек» холдингіне келіп түскен өтінімдер саны мыңнан асты. Екінші кезеңде жалпы құны 300 млрд теңгеден асатын 144 жоба келісім алды. Оның 89-ы Қазақстанның даму банкі мен екінші деңгейлі банктер арқылы тікелей кредиттеу тетігімен қаржыландырылады. 55 жоба «Қазақстандық тұрғын үй компаниясы» арқылы мемлекеттік бағалы қағаздарды сатып алу жолымен мақұлданған.
Ұлттық жобаның электрондық сатып алу платформасына арналған байланыс орталығы жұмысын бастады. Іске қосылған уақыттан бері 800-ден астам өтініш қабылданған. Қазір платформаны Bitrix жүйесімен біріктіру жұмыстары аяқталуға жақын. Бұл қадам сатып алу рәсімдерін жеделдетіп, қатысушыларға қолайлы цифрлық орта қалыптастыруды көздейді.
Отырыс барысында Қанат Бозымбаев желілер ұзындығы, қаржыландыру көлемі, өңірлік бөлініс тәрізді нақты параметрлер қамтылған жоспар-кесте бекітілгеніне қарамастан, кей көрсеткіштерде кешеуілдеу барын айтты. Әр индикаторға жауапты мемлекеттік органдар белгіленген. Вице-премьер мақсатты нәтижелерге қол жеткізу туралы толық әрі нақты мәлімет ұсынуды талап етті. Уақыт межесі бұзылған жағдайда лауазымды тұлғалардың жеке жауапкершілігі қаралатыны ескертілді. KPI көрсеткіштерінің орындалмауы басқару сапасына тікелей баға беретін фактор ретінде қарастырылады.
