Қалалық әкімдік қолдауымен Қазақстан Жазушылар одағы ұйымдастырған шара үш алып ақынның ұлттық әдебиеттегі орны мен рухани биігін бүгінгі көзқарас тұрғысынан зерделеуге арналды. Кештің атауы да ақындар болмысының көркем әрі дәл сипаттамасына айналып, олардың поэзиядағы даралық сипатын айқын көрсетті.
Кеш барысында Қадыр Мырза Әлінің ой биігі мен философиялық тереңдігі, ұлттық мінезді, қоғамдық сана мен адам болмысын терең зерделеген поэзиясы кеңінен ашылды. Тұманбай Молдағалиевтің қазақ лирикасындағы сезім кеңдігі, махаббат пен адам жанының нәзік қырларын айрықша сыршылдықпен жырлаған туындылары көрерменге ерекше әсер сыйлады. Ал Жұмекен Нәжімеденовтің терең ойлы, адам жан дүниесінің күрделі әлеміне бойлаған, азаматтық пафосы жоғары, ұлт тағдырына алаңдаған поэзиясы кештің рухани өзегіне айналды. Олардың ең таңдаулы өлеңдері оқылды.
Көркемсөз оқу, сахналық поэтикалық композициялар, бейнеүзінділер мен музыкалық сүйемелдеу кештің мазмұнын байытты. Ақындардың сөзіне жазылған әндер орындалып, поэзия мен музыка үндестігі қоса жарқырады.
Кештің ашылуында Алматы қаласы әкімінің орынбасары Абзал Нүкенов пен Қазақстан Жазушылар одағының төрағасы Мереке Құлкенов сөз сөйлеп, қазақ әдебиетінің ұлы тұлғаларын ұлықтаудың маңызына тоқталды.
Поэтикалық кеш – тек мерейтойлық еске алу шарасы ғана емес, қазақ поэзиясының алтын қорын жаңаша зерделеп, ұлттық әдебиетке деген құрметті күшейткен мазмұнды рухани басқосу болды. Үш бірдей алып ақынның өшпес мұрасы ел жадында мәңгі сақталатынын, поэзиясы ұрпақпен бірге жасай беретінін тағы бір мәрте дәлелдеді.
