Өндіріс өрісі кеңейген өңір

Отандық фармацевтиканы ілгерілеткен

Қасым-Жомарт Тоқаевтың бұл сапары «Әмір және Д» жауапкершілігі шек­теулі серіктестігінің қызметімен танысудан басталды. Кәсіпорын меди­циналық бұйымдар мен дәрілік заттар өндіреді. Президентке медициналық препараттар мен дайын өнім түрлерін шығаратын негізгі цехтың жұмысы көрсетілді.

«Әмір және Д» ЖШС әлеумет­тік ма­ңызы бар ауруларды диаг­ностикалауға арналған жедел тесті­лердің көптеген түрін шығарады. Бұл өнімдер В және С гепатитін, ВИЧ-инфек­циясын, миокард талмасын, сон­дай-ақ есірткі және психотропты заттарды анықтай алады. Кәсіпорынға тиесілі меди­циналық бұйымдардың 200-ден аса атаулы түрі бар. Бүгінде серіктестікте 94 қызметкер еңбек етеді.

Мемлекет басшысына «Super-pharm» фармацевтикалық компания­сы­ның жұмысы туралы ақпарат берілді. Бұл – елімізде медициналық бұйымдар өндіретін жетекші кәсіпорындардың бірі. Зауытта 600-ден аса еңбеккер жұмыс істейді. Компания отандық нарықтағы бір реттік қолдануға ар­налған медициналық бұйымдарға сұраныстың 30 пайызын қамтамасыз етеді. Атап айтқанда, кәсіпорын түрлі операциялар үшін хирургиялық және процедуралық жиынтықтарды, медициналық бетперденің барлық түрін, бірреттік қорғаныш киімін, санитарлық-гигиеналық мақсаттағы бұйымдарды өндіреді. Сонымен қатар медициналық шприцтер, инфузионды және қанды қайта құюға арналған система құралдары, басқа да өнімдер дайындалады.

Президент отандық фармацевтика индустриясының дамуы импорт­қа тәуелділікті төмендетіп, ұлттық денсаулық сақтау жүйесін нығайтуда маңызды екенін атап өтті.

Индустриялық аймақтың ілкімді істері

Бұдан соң Мемлекет басшысы «Тараз» шағын индустриялық аймағын аралап көрді. Алдымен Президентке Жамбыл облысына инвестиция тарту және агроөнеркәсіп кешенін дамыту жобалары таныстырылды.

Қасым-Жомарт Тоқаевқа экономиканы индустрияландыру, мал шаруашылығы мен ауыл шаруашы­лығы өнімдерін өңдеу, егіс алқаптарын әртараптандыру, су үнемдеу технологиясын енгізу бағытында атқары­лып жатқан жұмыстар туралы баяндалып, инвестициялық пул туралы мәлімет берілді.

Жыл басынан бері өңірге 599,2 млрд теңге инвестиция тартылған, өсім 33 па­йызды құраған. Кейінгі екі жылда облыс­та жалпы құны 242 млрд теңге болатын 56 инвестициялық жоба іске асырылған.

Мемлекет басшысына облыстағы жетекші кәсіпорындардың жобалары көрсетілді. Олардың қатарында «Қазфосфат» серіктестігінің минералды тыңайтқыштар өндіру және YONGGANG CENTRAL IRON and STEEL компаниясы салып жатқан металлургия зауыты жобалары бар.

Сондай-ақ Жаңатас қаласындағы «ЕвроХим-Қаратау» ауқымды инвес­тициялық жобасының аралық қоры­тындысы ұсынылды. Қазір күкірт қышқылын өндіретін жаңа зауытты іске қосу алдындағы тексеру жұмыстары жүргізіліп жатыр. Алғашқы өнім ішкі нарыққа жөнелтілді.

Алдағы уақытта пайдалануға беріле­тін Shengtai Biotech Co.Ltd жүгері өңдеу зауыты жөнінде де баяндалды. Шу ауда­нын­дағы бұл жобаға 1,5 млрд доллар ин­вес­тиция салынған. Сонымен қатар Байзақ ауданындағы Zhongkai Kazakhstan International Company қант зауыты құрылысы жайында мәлімет берілді.

Бұған қоса KAZ FMWORLD AGRICULTURAL MACHINERY компания­сының индустриялық аймақта шығарылатын ауылшаруашылық техникалары көрсетілді.

Сонымен қатар Президент Dala Glass әйнек өндіретін кәсіпорын қызметі­мен танысты. Зауыт биыл жазда іске қосыл­ған. Жобаға салынған инвестиция 1 млрд теңгені құрайды. Жылына 500 мың шаршы метр әйнек шығару жоспарланып отыр. Бүгінде аталған нысанда 50 адам жұмыс істейді. Қасым-Жомарт Тоқаев кәсіпорын қызметкерлерімен әңгімелесіп, олардың еңбегіне табыс тіледі.

Президент тарихи портрет пен автобус сыйлады

Осы күні Мемлекет басшысы Тараздағы мамандандырылған әскери мектеп-интернатқа барды. Қасым-Жомарт Тоқаев оқу кабинеттері мен спорт залын аралап көрді. Президентке мекемеде 180 бала білім алып, интернатта тұратыны жөнінде баяндалды.

Мектеп жас өскіндерге білім беріп, тегін тамақтандырады әрі тұрғын­жаймен қамтамасыз етеді. Оқу бағдар­ламасы 7–11 сыныптарға арналған. Білім ошағының негізгі мақсаты – келешектегі Отан қорғаушыларды даяр­лау, оларға әскери-патриоттық тәрбие беру. Әскери интернатта курсанттар сабақтан тыс уақытта роботтехника, дронды басқару, жасанды интеллект үйірмелеріне қатысады. Болашақ әскери қызметшілерге ағылшын тілі тереңдетіп оқытылады.

Қасым-Жомарт Тоқаев оқушылармен әңгімелесіп, мемлекет тарапынан әскери білім беру жүйесін дамытуға ерекше назар аударылып отырғанын атап өтті.

Іс-шара соңында Мемлекет басшысы білім ошағына Бауыржан Момыш­ұлы­ның портретін және елімізде құрас­ты­рылған мектеп автобусын сыйға тартты.

Сонымен қатар Қасым-Жомарт Тоқаев Тараздағы аритмология клиника­сының жұмысымен танысты. Бұл – жүрек соғысының бұзылуын жедел емдеуге маманданған медициналық мекеме.

Президентке клиниканың кардио­логиялық және кардиохирур­гиялық көмек, соның ішінде жоғары техно­логиялық араласу арқылы дәрігерлік жәрдемнің толық спектрін көрсете алатыны жөнінде баяндалды.

Өңірдегі бірегей орталық жүректі радиожиілік пен криоаблация тәсіл­дерімен емдейді. Мекеме бір ауысымда 150 адамға дейін қабылдай алады. Сондай-ақ 47 орындық стационар бар. Орталыққа құйылған жалпы инвестиция көлемі 2,5 млрд теңгені құрады.