Иә, 1925 жыл – қазақ өнерінің тарихындағы ұлы бетбұрыс кезең. Бүкіләлемдік жәрмеңкенің сахнасына домбыра күмбірімен қатар көтерілген Әміре Қашаубаевтың қайталанбас үні Еуропа тыңдарманын ғана емес, бүкіл әлемді таңдай қақтырған еді. Оның шырқаған «Балқадишасы», «Ағаш аяқ», «Үш досы» мен сан түрлі халық әуені – қазақ даласының тәкаппар мінезін, кең жүрегін, ұланғайыр рухын әйгіледі. Енді, міне, сол тарихи сәттің құрметіне ұйымдастырылатын кеш – тұлға тағылымын ұлықтаудың айқын үлгісі.
«Ән атасы – Әміре» музыкалық кеші – тек концерт емес, көркем қойылымға айналған театрлық туынды. Көрермен Әміренің өмір жолынан сыр шертер сахналық көріністерді тамашалап, әншінің тұлғалық табиғаты мен заман тынысын сезінді. Заманауи музыкалық өңдеулер мен дәстүрлі нақыш бір сахнада тоғысып, қазақ руханиятының үзілмес сабақтастығын көрсетті.
«Халық қазынасы» ұлттық өнер орталығының әртістері көрермен назарына дәстүр мен заманауи сахна өнері үйлесім тапқан мазмұнды концерт ұсынды. Атап айтсақ, кеш бағдарламасына «Құлагер», «Қарқаралы», «Дударай», «Балқадиша» сынды халқымыздың жүрегінде сақталған әндермен қатар Тәттімбет, Құрманғазы, Қазанғап күйлері енгізілген. Ұлттық музыкаға тән қайталанбас үн, домбыраның терең күмбірі мен дәстүрлі вокалдың асқақ әуені көрерменді бір сәтте ғасырлар арнасына тартып әкеткедей әсер сыйлады.
Әнші рухы асқақтаған айтулы кеште Қазақстанның еңбек сіңірген қайраткерлері – Құмарбек Қалқатай, Ерлан Рысқали, Ерболат Шалдыбеков, Айгүл Елшібаева, Ардақ Балажанова, Нұрболат Арзамасұлы, Қайрат Айтбаев, Елмұра Жаңаберген сынды майталмандар Әміре салған ән мектебінің биік үлгісін әйгіледі. Сонымен қатар сахна төрінде өнер көрсеткен «Дарын» Мемлекеттік жастар сыйлығының лауреаттары – Асқар Мұқият, Перизат Тұрарова, Күнсұлу Түрікпен, Аяулым Қамажан, ұлттық және халықаралық байқаулардың жүлдегерлері Еділ Басығара, Әлихан Дүйсенбай, Бауыржан Мұхаметбай, Венера Табыс, Ақерке Тәжібаева, Дәрия Бекпенбет бастаған өнерлі жастар да тағылымды кештің көркін қыздырды. Бір сахнада түрлі буын, түрлі мектеп, түрлі орындаушының бас қосуы – ұлттық өнердің үзілмес жалғастығының айғағы.
«Ән атасы – Әміре» – бүгінгі ұрпақтың кешегіні құрметтеуіне, өнердің ұлы мектебіне тағзым етуіне арналған кеш. Бұл – ұлттық сананы серпілтетін, тамырымызды танытатын, халық әнінің биік болмысын дәріптейтін рухани мереке. Қазақ әнін алғаш рет әлемдік деңгейде мойындатқан Әміре Қашаубаевтың өнері – тек тарих емес, бүгінгі күннің де тынысы. Елорда төріндегі айтулы кеш сол асыл өнердің қайта жаңғыруына, жас ұрпақтың жүрегінде ұлттық әуеннің мәңгі қалуына үлес қосқаны сөзсіз.
